وارث چنڑ

وارث چنڑ سرائیکی زبان دا شاعر ہے۔

ڄم پل

١٤ اگست ١٩٩٢ء کوں ڄمے۔ بہاول پور نال تعلق ہے۔

گورنمنٹ پرائیمری سکول چاہ عاصم والاسمہ سٹہ بہاول پور بستی منگوانیاں

نمونہ کلام

تُوں ہئیں دل دی دھڑکن میݙی تُوں میݙی جِند جان

تئیں تُوں جِند قُربان ہے میݙی سُوہݨا پاکستان

سُوہݨے رنگ ہِن مال ہنبھاہ دے، ٻوتھیے رہندن کھیت کپاہ دے

حُقہ ٻہے ٻُڑکیندے کھوہ تے میݙا ڄٹ جوان

تھل سُوہݨا دامان وی سُوہݨا، دیرہ تے مُلتان وی سُوہݨا

میکوں سب تُوں سُوہݨا لڳدے میݙا چولستان

بیشک کائینی محل تے ماڑیاں، ساݙا کلچر جُھمراں تاڑیاں

ساݙے جھوپڑ تے گوپیاں وچ آئے رہندن مہمان

وارث چنڑ بہاول پوری

شعر

جݙاں یاد اندی ہے پیو نال ماء دی

نکل دھاڑ ویندی ہے قسم خدا دی

وارث چنڑ بہاول پوری

آپ وسا

ݙاݙی اماں، ماما تیݙا رُس ڳئے ساݙے کول

ہُݨ تاں ول آ چھوڑ ڳیئاں کُوں آ کے آپ منا

تیݙے ٻاجھوں روہی لڳدی ݙیݨ ݙراکِل وانگ

اُجڑیاں جھوکاں بُھردیاں سالہیں آ کے آپ وسا

وارث چنڑ بہاول پوری

ݙوھڑا

ہووے مطلب پیریں جگ پوندے بن مطلب بے پرواہ ہوندن

سُکھ ہوندن سکھݨیں ݙو ݙیہنہ دے ݙُکھ ایں جیویں ساہ ہوندن

جݙاں بخت بھنور وِچ آ پووے ول دُشمن ہک دے ݙاہ ہوندن

ہک وارث یار دی خاطِر ول ودے پندے وقت دے شاہ ہوندن

وارث چنڑ بہاول پوری

سئیں وارث چنڑ بہاولپوری دے بیت

نِکھڑ ونڄݨ دیاں کیݙو ریتاں چلیاں وو

تھی وِیران ڳیاں ہِن ساݙیاں ڳلیاں وو

عربی شیخ جݙاں دے روہی مَل ڳئے ہِن

ہَرݨ، تلوراں، کُونجاں ول نئیں ولیاں وو

جُھمر دا تہوں گھیرا گَھٹدا ویندا ہے

سینگیاں جو آ ساݙے نال نہ رلیاں وو

کئیں نزریا ہے ساݙے ساکھیں چاکھیں کوں

ٻیریں، ڄالیں، کھجیاں ول نئیں پھلیاں وو

وارث چنڑ بہاول پوری