نواں عہد نامہ (افسانہ)
ظلم تے ناانصافی دے خلاف پتہ نہیں بندے دی کوشش کݙاں مُکسی۔ کݙاں او اے لڑائی جِت گھِنسی۔ اے لڑائی ہک میدان اِچ نہیں لڑی ویندی پئی،اے چُو مُکھی لڑائی ہے ہر وقت تے ہر میدان اِچ لڑی ویندی پئی ہے۔ تمام پیغمبر،دانشور،شاعر،سیاستدان،حکیم،دانا تے سیاݨے کمروز تے طاقتور سب ایں لڑائی اِچ شریک ہِن تے اپݨے اپݨے میدان اِچ مورچے بݨائی ٻیٹھین تے ناانصافی مُکݨ اِچ نہیں پئی آندی ۔ آخر کیا وجہ ہے جو ہر فتح دے بعد جیڑھے ویلھے بندہ کمر بند کھول تے سہی کڈھݨ لڳدے تاں اونکوں پتہ لڳدے جو ناانصافی تے ظلم وَل نویں ہتھیاریں نال اوندے سامݨے کھڑے۔ تمام مذہبی صحیفے اپݨی تمام سچائی نال ہُت پئین۔ آخر انہیں کوںاے آکھݨاں پئے جو شِطان کوں تاں اللہ تعالیٰ خود مہلت ݙتی جو بندیں کوں بے راہ کریندا رہ۔ ایسے اے ہار منݨ آلی ڳالھ ہے۔ کیا واقعی شیطان کوں اساں نہیں مار سڳدے کیا۔؟ مذہبی صحیفیں دا ایہو مہفوم ہے؟ جے اے ڳالھ من گھنوں تاں وَت مذہبی صحیفیں دی کیا لوڑ باقی رہ ویندی ہے۔ انہیں ساریں ڳالھیں دے باوجود اساں سمجھدے ہئیں جو مذہبی صحیفیں دی لوڑ موجود ہے۔ اے داݙے دل دی،ساݙے اندر دی ڳالھ ہے،جے انہیں دا کوئی فائدہ نہ ہوندا تاںلوک ہزاریں سالیں کنوں انہیں کوں ڳل نال نہ لائی ودے ہوندے انہیں کوں لوک چھوڑ چکے ہوندے۔ جنگ اِچ کوئی وی فریق فالتو ہتھیاریں کوں مونڈھے تے نہیں چائی ودا ہوندا۔ ایندا مطلب ہے جو ایں لڑائی دا اَنت ایں واسطے وی نہیں تھیا جو اساں ایندی نوعیت کیوں نہیں سمجھ سڳیے نہ اساں انہیں ہتھیاریں کوں حالی تائیں ورت سڳیے ہیں۔ شاید اساں خود اپݨی طاقت کوں وی نہیں سمجھ سڳیے۔ کیا موسیؑ دا مسٔلہ کݙوں تھی ڳئے۔ موسیٰ تے خدا دا آپس اِچ کیا رشتہ ہے جیڑھا فرعون دا کائنی۔ اے سمجھݨ کیتے کیا کوئی نواں عہد نامہ لکھݨا پوسی۔؟
ٻیا ݙیکھو[لکھو | ماخذ وچ تبدیلی کرو]
ٻاہرلے جوڑ[لکھو | ماخذ وچ تبدیلی کرو]
- گُلِ رعنا ادب سوسائٹی دے ٻئے کتاباں۔ ۔ ۔۔ ۔ ۔ ۔