نواز جاوید

اصل ناں    محمدنواز

قلمی ناں    نواز ؔجاوید

جٖمنْ        1955ء

جاہ پتہ     مکان نمبر87اے بلاک نمبر18فرید آباد کالونی ڈیرہ غازیخاں

نوازؔ جاوید ڈیرہ غازی خاں دے صاحبِ کتاب شاعر ہن ۔کجھ عرصہ پہلے فالج دے چنگل اچ آئے ہوئے ہن۔انہاں اپنْے خط اچ لکھئے جو ہُنْ کجھ لکھنْ پڑھنْ دے قابل تھی گٖیا ہاں۔اللہ تعالیٰ انہاں کوں ایں مرض توںمکمل نجات ڈٖیوے۔آمین۔

غزل

وقت اوکھے گزار بٖیٹھے ہیں

قرض سارے اتار بٖیٹھے ہیں

جیتی بازی کوں ہار بٖیٹھے ہیں

سب کشالے سہار بٖیٹھے ہیں

ساریں گٖالھیں کوں کنڈ دے پچھوں سٹ

ہاں دے گوشے کوں ٹھار بٖیٹھے ہیں

رکھ تے سینے تے صبر دیاں سلھیں

نویاں کندھاں اسار بٖیٹھے ہیں

سادیاں اکھیں توں نیر وہندے ہن

لوک اَہدن وسار بٖیٹھے ہیں

سہنْے پوسن نوازؔ سب گھاٹے

کر جو نینہ دا وپار بٖیٹھے ہیں