نظم

بہاولپور دے واسی ہک سرائیکی دھرتی دے بچڑے دی ارداس

اساں صرف سرائیکستانی ہیں ساڈی سب دی ہکا بولی ہے اساں سب دی سانجھی ما دھرتی اساں سب دی سانجھی لولی ہے چھڑی اپنی دھرتی منگدے ہیں ایہا گالھ ہمیشہ چولی ہے ساکوں ول اوندا محکوم نہ کر جیں سیت اساڈی رولی ہے اساں روہی تھل دامان ہیسے اساں جند دھرتی توں گھولی ہے

میڈا سئیں ساکوں تقسیم نہ کر میڈا سئیں ساکوں تقسیم نہ کر

ساڈا میلہ "مہرے والے" دا ساڈا میلہ " کوٹ ڈیراوڑ" دا ساڈے میلے ٹھیلے سانجھے ہن ساڈی ہکا ساہ دی تار وی ہے ساڈے ہکو سانویں قصے ہن ساڈیاں ہکو سانویاں جھمراں ہن انہاں جھمراں دے وچ عشق وے ہے انہاں جھمراں دے وچ پیار وی ہے

میڈا سئیں ساکوں تقسیم نہ کر میڈا سئیں ساکوں تقسیم نہ کر

جینکوں پار اہدیں او پار تاں نہیں او پار وی ہے اروار وی ہے اتھاں تیڈا باغی "مخلص" وی جیندا لہجہ سچ کردار وی ہے او وین ہے اجڑے "ہاکڑہ" دا ساڈا پندھ وی ہے اتبار وہ ہے اتھاں "نصراللہ خاں ناصر" سئیں تاریخ دا پہرے دار وی ہے اتھاں "ظفر لشاری" من موہنا جیڑھا لفظیں دا کھڈکار وی ہے

میڈا سئیں ساکوں تقسیم نہ کر میڈا سئیں ساکوں تقسیم نہ کر

اتھاں "عبدالباسط بھٹی" وی ساڈے وسبے دا من ٹھار وی ہے ہک بولی ہے ہک رشتہ ہے ساڈا ہکو ہار سنگھار وی ہے ہک ڈوہڑے، غزلاں کافیاں وی ہکو مٹیاں دا گھبکار وی ہے اساں تخت لہور دے قیدی ہیں ساڈی ہکا اے تکرار وی ہے

میڈا سئیں ساکوں تقسیم نہ کر میڈا سئیں ساکوں تقسیم نہ کر

اتھاں خواب وی ہن اظہار وی ہے اتھاں "عاشق خاں بزدار" وی ہے اتھاں سوکڑی،طارق، تابش ہن اتھاں "اشو" دی مہکار وی ہے اتھاں تھل دی مونجھ سولڑی ہے اتھاں مٹھڑی مونجھ ملہار وی ہے ساڈے وݨ تے پکھی سانجھے ہن توڑے ہک دریا وچکار وی ہے اتھاں روح دے خالص رشتے ہن اتھاں "خواجے" دا دربار وی ہے اساں تیڈی سوچ دے باغی ہیں توں ہن اے ظلم عظیم نہ کر

میڈا سئیں ساکوں تقسیم نہ کر میڈا سئیں ساکوں تقسیم نہ کر

(شاہد عالم شاہد دی ہک نظم)