نسیم بخاری

اصل ناں      نسیم عباس بخاری

قلمی ناں       نسیم بخاری  

جمن           1975ء  

تعلیم          بی اے

پیشہ           سرکاری ملازمت 

فون نمبر        03332371414

جاہ پتہ        بی اینڈ آر کالونی ،میانوالی

سید نسیم بخاری دا شمار ضلع میاں والی دے نمائندہ شعراء وچ تھیندے آپ سرائیکی ماء بولی تے ماء دھرتی   نال حد درجے دا پیار کریندن۔شخصیت دے حوالے نال وی آپ ہک خوش اخلاق ، ملنسار تے یاریں دے یار بیلی ہن ۔ایں کتاب دے سلسلے وچ اُنہاندا میڈے نال خصوصی تعاون رہ گئے،میں آپ د ا بہوں مشکور ہاں۔

کتاباں

• کھماٹ

نمونہ کلام

سُݨ ائے زہرؑا دا چَن تیݙی کیا بات ہے

آکھے کربل دا بَن تیݙی کیا بات ہے

چا کے شبیؑر اصغؑر کوں آھدا رہئے

میݙا تشنہ دہَن تیݙی کیا بات ہے

تیݙی خشبو رچی دین دے جسم وچ

کربلا دا چمَن تیݙی کیا بات ہے

رب وی مہربان تھئے حُر وی قربان تھئے 

زخم متھڑے تے ہَن تیݙی کیا بات ہے

کربلا کربلا کربلا ۔۔۔۔۔۔۔۔۔۔۔کرب دی

میݙا زخمی بدن تیݙی کیا بات ہے

ہر وطن تیݙا اپڑا وطن بݨ گئے 

ظاہراً بے وطَن تیݙی کیا بات ہے

میݙی تُربت کوں جنت بݨاچھوڑا وی

کربلا دا کفَن تیݙی کیا بات ہے

لِکھ نسیمؔ انج ولا آہدے ہی رہ ونجن

تیکوں خود پنج تَن تیݙی کیا بات ہے

نظم

جہڑا دنیا تے میݙا بھرَم ہے

سارا پاک حسینؑ کرَم ہے

تیݙے کیتے کیا ہے تُوں جاݨیں

میݙے کیتے کربل حرَم ہے

اساں ہر دم یاد حسینؑ اچ ہیں

ساݙا سارا سال محرَم ہے

جے اکھ رکھدائیں تاں ݙیکھ تا سہی

پاݨی دے مونھ تے شرَم ہے

اے آل نبیؐ کوں روݨ تاں 

ساݙا مذہب ہے ساݙا دھرَم ہے

اے فرق نسیم محسوس تا کر

ہر مومن دا دل نرَم ۔۔۔۔۔۔۔۔۔۔۔ ہے

نظم

جئیں کوں سادات دی محبت ہے

اونکوں اللہ دے نال چاہت ۔۔۔۔۔۔ہے

کنݙ تے بیٹھن حسینؑ ابنِ علیؑ

ݙیکھ سجدے دیوچ نبوت ہے

پیار کرݨا حسنؑ حسینؑ دے نال

میݙی من گھن اے عین سنت ہے

یومِ عاشور وس گیاۓ اکھ وچ

وہندا راہوݨ اے اکھ دی فطرت ہے

فرق دھی بھیݨ دا رکھیندے ہیں

ساری شبیرؑ دی عنائیت ۔۔۔۔۔۔۔۔۔ہے

تیݙے کیتے ہے عام جئ مٹی

میݙے کیتے اے خاک دولت ہے

میݙا اج وی حسینؑ زندہ ہے

تیݙا بݨ گئے یذید عبرت ہے

اوندے در تُٶں نسیم منگدا ہاں

جئیں تے اللہ دی خاص رحمت ہے

غزل

تیݙیاں یاداں دے سنگ کریندا ہاں

میں محبت کوں رنگ کریندا ہاں

میکوں جیوݨ دا ݙا تا نئیں آندا

پر میں جیوݨ دے ڈھنگ کریندا ہاں

میں محبت دی بادشاہی کیتے 

نال نفرت دے جنگ کریندا ہاں

تیݙی قربت دا سُر نچیندا ہے

ون پونے میں انگ کریندا ہاں

تیݙی ویݨی تے کچ دی ونگ نئیں نئیں 

اپڑے دل کوں میں ونگ کریندا ہاں

عقل کونی تہوں تاں میں اکثر 

عقل لوکاں دے دنگ کریندا ہاں

نندر آئی وی تاں یار بِسم اللہ

اپڑا سینہ پلنگ کریندا ہاں

اج دی جدت دا اے تقاضا ہے

میں ہزارے کوں جھنگ کریندا ہاں

اِذن گھِن کے نسیم سید توں

شعر اپڑے ملنگ کریندا ہاں

غزل

کاغذ تے مہتاب بنڑیساں وت تُوں ڈیکھیں

خواب دی اکھ اچ خواب بنڑیساں وت تُوں ڈیکھیں

تک نئیں پوندی جیندی تیڈے در تے آسن

تیکوں عزت ماب بنڑیساں وت تُوں ڈیکھیں

متھے تے محراب سجا کے وڈدا کیوں ہیں

بھوئیں تے میں محراب بنڑیساں وت تُوں ڈیکھیں

ڈوں اکھیں دا پانڑی رلسی بیڑی ٹھلسی۔

راوی نال چناب بنڑیساں وت تُوں ڈیکھیں

ساڈی وستی بھاہ لگی ہے کونڑ بجھیسی

ہنج دا میں سیلاب بنڑیساں وت تُوں ڈیکھیں

جنگ تاں ہکا اسے گل تے جِِت گھنڑی ہے

گھوڑے نال رکاب بنڑیساں وت تُْوں ڈیکھیں

ہک تیڈی تصویر بنڑیساں کاغذ اُتے

تیڈے جاں اعصاب بنڑیساں وت تُوں ڈیکھیں

طوطے لالی بُلبُل مُور وی ڈیکھنڑ آسن

کاں کوں جاں سُرخاب بنڑیساں وت تُوں ڈیکھیں

نسیم بخاری

دعا

کجھ نہ تھیوی راج دُلارا حسبی اللہ 

ڈھاندی جاہ تے آکھس یارا حسبی اللہ

کالی رات ہجَر دی میکوں مار گھتیندی

جے نہ آہدا یار اندھارا حسبی اللہ

تیکوں آسرا ݙے کے خالی میں نئیں آکھا

جسم دی لُوں لُوں آکھاۓ مارا حسبی اللہ

زندگی آھدی اِسے گلُوں بچ میں ویندی

میکوں آھدئے روز گزارا حسبی اللہ

جیݙا وݙا ݙکھ ہے ملدا ھس کے چیندا 

ݙکھ وی آھدِن ݙکھ دا مارا حسبی اللہ

اپڑے آپ کوں اساں پیارے کونائیں جیویں 

توں ہے ساکوں جان توں پیارا حسبی اللہ

پکھو نال ہوا دے رل کے ݙیکھ نسیما

رل کے آہدے چن تے تارا حسبی اللہ

نسیم بخاری

تغاری

توݨیں سر دا بھار تغاری

ساݙی ہے دستار تغاری

تاج محل اچ حصہ اے میݙا 

میکوں آہدی اے یار تغاری

تیݙا میکوں چنگا لگدۓ

سݨدا جاں کھڑکار تغاری

سَت سمندر میں ونج ݙٹھن

میکوں گھِن گئی پار تغاری

ٹھیکے دار ݙسایا میکوں 

میݙی ہے سردار تغاری

خون پسینہ جاں ہک تھیوے 

تاں بݨدی ہے یار تغاری

بُکھ تے ایندی جنگ ہے اکثر 

بُکھ کوں ݙیندی مار تغاری

دنیادار دے کیتے اج وی

دولت دا پرچار تغاری

ہتھ پھیلاوݨ کول نسیما

نت کرواۓ انکار تغاری

تیݙے اجکل ڈھیر شنَا ہِن

تیݙے اجکل ڈھیر شنَا ہِن

میݙے اپڑے پیر شنَا ہِن

بابا آہدۓ خود تُوں سیر ہیں

تیݙے سوا سیر شنَا ہِن

سوہݨا رشتہ ماسی آلا

ہوندے ݙیکھ مسیر شنَا ہِن

گالُھڑ آھدۓ رُت آگئ ہے

ہݨ تاں میݙے بیر شنَا ہِن

میکوں وی کوئی پتہ لگے

کوݨ ہِن تیݙے کیر شنَا ہِن

ھوون جے لجپال نسیما

چنگے ہوندے غیر شنَا ہِن

اپڑے دل دا بھار اُتارم

اپڑے دل دا بھار اُتارم

تہوں تاں تیڈا نام پُکارم

پانڑی پانڑی تھی گیا پانڑی

ہنج کوں دریا نال کھلارم

لوک آہدے ہِن چنگا شعر ہے

ورقے تے بس لیکا مارم

تاں تلوار کوں عزت ڈھئی ہے

پہلے اپڑاں خون پگارم

اج پانڑی دا گلما نپ کے

بڈدی بیڑی کوں ونج تارم

ہکے جھٹ اچ قافلہ بنڑ گئے

جاں حیؑدر دا نعرہ مارم

پانڑی دیوچ مار کے پتھر

ایویں تیڈا نقش اُبھارم

پچھے ول ول توں کیوں ڈہدائیں

تیڈے نال نسیم ہے یارم

غزل

جیڈا جُھکدا ویندا ہاں میں

اُچا تھیندا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سچ کوں پال کے دل دے اندر

بھاہ تے ٹُردا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ساہواں دی رفتار توں لگدۓ

موت دو بجھدا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اکھیں میڈیاں بند ہِن بھانویں

تیکوں ڈہدا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کونڑ ہیں کیا ہیں کِتھوں دا ہیں

خود تُوں پچھدا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سِک دا دریا واہندا پیاۓ

ڈیکھو تردا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میڈے نال ہے میڈا سایہ

اوں توں ڈردا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خوشیاں کھارے چڑھدیاں پیئن

ڈیکھ کے روندا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آسوں پاسوں ڈھیر ہجوم ہے

کلھا ہسدا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پہلے اپڑا تھی گھِن جیویں

آپ کوں آہدا ویندا ہاں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تیڈے راہ تے لا کے اکھیں

رستہ بنڑدا ویندا ہاں میں

۔۔۔۔۔۔۔۔۔۔۔۔۔نسیم بخاری ۔۔

سہہ غزلہ

۔۔۔۔۔۔۔۔۔۔۔۔۔۔ ۔۔۔1 ۔۔۔۔۔ ۔۔۔۔۔۔۔۔۔۔۔۔

ہک ڈینہہ تھیسی حساب سانبھی رکھ

ہئی محبت ثواب سانبھی رکھ

میں سوال ہاں تیڈے عقیدے دا

تیکوں لبھسی جواب سانبھی رکھ

ہنج اصل وچ ہے معرفت رب دی

اکھ دا سُنڑ توں خطاب سانبھی رکھ

ہجر سونا ہے پچھلی عمراں دا.

حالے پا نئیں توں صاب سانبھی رکھ

ذکر "اکبر" دا تھیسی کم آسی.

توں اکھیں دا چناب سانبھی رکھ

مُنہ مہابہ ہے تیڈا سرمایا

کر نہ چیتا خراب سانبھی رکھ

وڈکے آہدن جو سچے ہوندے ہِن.

رات پچھلی دے خواب سانبھی رکھ

ایندے بدلے ولا خوشی ملسی.

مونجھاں دی لکھ کتاب سانبھی رکھ

گال ہآئی تاں ہکے فوٹو دی.

اچھا اچھا جناب سانبھی رکھ

بڈھڑی رُت اچ کھِلنڑ دے کم آسی.

اپنڑاں سارا شباب سانبھی رکھ

اساں لوکاں نسیم مر ونجڑۓ

ساڈی ہک ادھ کتاب سانبھی رکھ

۔۔۔۔۔ ۔۔۔ 2 ۔۔۔۔۔۔۔۔۔۔۔

ہووی دنیا تے راج سانبھی رکھ

اپڑے رسم و رواج سانبھی رکھ

پیرو وانڑاں دے نال کیوں لڑدائیں.

تیڈے سر تے ہے تاج سانبھی رکھ

ساڈیاں اکھیں تیڈے بٹنڑ بنڑسن

کر کے چولے دے کاج سانبھی رکھ

ہنج نہ سکی تاں کھیڈ وِنج ویسی

اکھ دی بنری دا ڈاج سانبھی رکھ

ساڈا اپنڑاں مزاج ہے جیویں

اپڑا وکھرا مزاج سانبھی رکھ

بھار دل دا اے ہولا کر ڈیندی

ہنج ہئی ڈکھ دا علاج سانبھی رکھ

رات کالی دے نال عشق ہیوی؟

سُوجھلے دی پہاج سانبھی رکھ

ڈُکھ نہ ڈیکھیں نسیم کئیں ویلے

ہوونی سُکھ متھاج سانبھی رکھ

۔۔۔۔۔۔۔۔ 3 ۔۔۔۔۔۔۔۔ ۔

جگ توں تھی بے نیاز سانبھی رکھ

ساری دنیا دے راز سانبھی رکھ

جے محبت کوں سانبھ سگدا ہیں

ہووی عمراں دراز سانبھی رکھ

متھے محراب دی ضرورت نئیں

پڑھ کے ذہن اچ نماز سانبھی رکھ

ہجر ہک ڈینہہ ولا نواں تھیسی

ودھے جیڈی میاز سانبھی رکھ

ساہ دے سُر تے ہے زندگی ٹردی

دل دی دھڑکن دے ساز سانبھی رکھ

میں نہ ہوساں کوئی تاں چا گھنسی

اپڑے نخرے تے ناز سانبھی رکھ

تیڈے کولوں نشانڑی پیکا دی

میز کرسی دراز سانبھی رکھ

اوندی چپ توں نسیم لگدا ہے

ہک ڈینہہ ڈیسی آواز سانبھی رکھ

نسیم بخاری