نذیر لغاری تے سرائیکی مزدور

نذیرلغاری سئیں اپنڑی پندھ وہانڑی اچ سعودیہ اچ اپنڑے تل وطنی سرائیکیاں کوں مزدوی کریندیں ڈیکھ تے لکھدن. . . . . . . "بکھ دے ہوٹے ساڈے تل وسیب توں آونڑ والے مستری مزدور کرنڈی، سول ، گٹکا ، تغاری، بیلچہ چا تے ادھوری کائنات کوں پورا کرنڑ دے ترلے ودے کریندن ، نویاں ماڑیاں اسریندن چونا تھیونڑ توں پہلے باہر آ کھڑدن، پل بنڑیندن جتھوں ساہ جھنڑ تے ٹپدن متاں کوئی جھل نہ گھنے، کھوہ کھٹیندن، ہنڑ تیل آوے یا پانڑی انہیں دا کیا." . قبلہ نذیر لغاری سئیں اے گالھ اپنڑے تل وطنی مزدوریں بارے کیتی اے جیرھے اپنڑے عربی اسلامی بھرانویں دیاں ماڑیاں اسریندن پر او بھرا ماڑی وچ تاں پرے دی گالھ اے ماڑی دی کندھ دی چھاں تلے وی نئیں باہنڑ ڈیندے. . . ویسے اے صرف سرائیکی مزدوریں دا ڈکھ نئیں بلکہ پوری دنیا دے مزدوریں دا ڈکھ اے. . .محل بنڑاون آلا محل اچ سمھ نئیں سگدا، قالین بنڑاون آلا اپنڑے گھر قالین وچھا نئیں سگدا اپنڑے ہتھ نال لیموزین تے مرسڈیز بنڑاونڑ آلا مزدور انہاں گاڈیاں دی سواری کجا صرف دھوڑ ای جھپ سگدے. . . اے تاں پوری دنیا دے مزدوریں دا سانجھا ڈکھ اے. .سرائیکیں دا وی ایہو ڈکھ اے. . (بلال بزدار)