موسیٰ احقرؔ

اصل ناں       محمد موسیٰ

قلمی ناں        موسیٰ احقرؔ

جمن            1950ء 

تعلیم            پرائمری

پیشہ              مزدوری

فون نمبر          03326147854

جاہ پتہ           گلشن اقبال ٹاؤن، ولائے والا ڈیرہ غازی خان

موسیٰ احقر ہک ڈینہ ہمدم کھوسہ دے رَلے میڈے کول تشریف گھن آئے، ہمدم صاحب انہاں دا تعارف کرویندیں ہوئیں آکھیاجو ایہ میڈے شاعر دوست موسیٰ احقر ہن!میں انہاں دی سادگی ڈیکھ کے دل وچ سوچا جو ایہ کوئی معمولی جھئیں شاعر ہوسن،پر جڈاں انہاں دا کلام سنیا تاں میں حیران رہ گیم ۔کیوں جو ایہ تاں گِندی وچ چھپئے ہوئے لعل ہن۔ شاعری کہیں دی میراث نہیں بلکہ عطیہ خدا وندی ہے،شعری مجموعہ’’مجال‘‘ دے خالق موسیٰ احقر دی شاعری واقعی وہبی شاعر ہے، کسبی نہیں۔آپ دا ایہ شعر پڑھ کے ڈیکھو تے انصاف خود کریسو!

خدا باجھوں ولا کہیں دا سہارا نئیں گھدا اج تئیں

ڈِٹھے جئیں ڈینہ سہاریں کوں ودے منگدے سہارے ہن

غزل

خوشی دا  کوئی پل  آوے خوشی  محسوس  تھیندی ہے

سجن ویڑھے  جو  ول آوے  خوشی  محسوس تھیندی  ہے

مدامیں دے لُڑھئے ہوئے کوں کہیں جاء تے کتھاؤں یارو!

نظر خشکی  دا  تل آوے  خوشی  محسو س تھیندی  ہے

جے  عرصے  دی بھَنی  جھمر  رساون دے  کیتے  لحظہ

رلے  سانو ل  جو رل  آوے  خوشی محسوس  تھیند ی ہے

بہاریں دے رُتیں دے وچ جِڈیں ڈیکھوں تاں پھُل ڈسدن

خزاں اندر  جے  پھَل آوے  خوشی  محسوس تھیندی ہے

لُٹی بنری  دے  سیجھیں دو نگاہیں بھال  شفقت  دیاں

ولا کہیں  دا  پنل آوے  خوشی  محسوس تھیندی  ہے

مثالاں ڈے  کرائیں  احقر ؔ  سیانے  لوک سچ  آہدن

جڈاں مشکل  تھی  حل آوے  خوشی  محسوس تھیندی ہے