مصادر

او لفظ جیندے کنوں کہیں کم دا ہووݨ۔ کرݨ۔ یا تھیوݨ دا پتہ لڳے، فعل سݙیندے۔ اتے ایہ فعل جہڑے لفظ کنوں بݨدے اوکوں "مصدر" آہدن، مصدر او اسم ہے جیندے وچ کہیں کم دا کرݨ، ہووݨ، تھیوݨ، یا سہݨ، کہیں ویلے وخت دی پابندی کنوں بغیر ظاہر تھیوے۔

مصدر اسم ہوندے جیندے کنوں ٻئے لفظ تاں بݨ سڳدے ہن۔ پر او آپ کہیں ٻئے لفظ کنوں نھِیں بݨیا ہوندا۔ سرائیکی مصدر دی نشانی ایہ جو ایندا آخری حرف "ݨ" ہوندے۔ اتے ایں "ݨ" کنوں پہلے حرف اُتے "زبر" آن٘دی ہے۔ جیویں: کھاوَݨ، آوَݨ، ٻوللَݨ، آکھݨ، کھلَݨ، وغیرہ

سرائیکی وچ مصدر دیاں چار صورتاں ہوندیاں ہن۔

سرائیکی مصدر دیاں چار صورتاں

مصدر	اردو وچ معنے	سادہ صورت	مجہول صورت	متعدی صورت	متعدی المتعدی صورت
کھاوَݨ	کھانا	کھاوݨ	کھویجَݨ	کھوان٘وݨ	کھوان٘وݨ
آکھَݨ	کہنا	آکھݨ	اَکھیجَݨ	اکھان٘وݨ	اکھوان٘وݨ
اُبھرݨ	اُبھرنا	اُبھرَݨ	اُبھریجَݨ	اُبھارݨ	اُبھرواوݨ

سرائیکی مصدر گنتری وچ ترائے ہزار کنوں ودھ ہن۔ انھاں مصدراں دی وݙی خوبی ایہ ہے جو ایہ چھوٹے کنوں چھوٹے عمل کوں الگ الگ تے انج انج لفظ نال ظاہر کریندن۔ مثال دے طور تے ایہ ترائے مصدرد ݙیکھو:

تلکھݨ: روٹی کوں معمولی جیہا چوپڑݨ

مَکھݨ: روٹی کوں کجھ زیادی چوپڑݨ

چوپڑݨ: روٹی کوں چکنائی نال ترو تر کرݨ

ایں مصدر وچ چوپڑݨ دی ہر ہر کیفیت کوں انجو انج مصدر نال ظاہر کیتا ڳئے۔ [[ونکی:سرائیکی زبان تے ادب]]