قنون تے عمل

وکیپیڈیا توں

اسمان توں لتھے قنون تے عمل کرنڑ اوں ویلھے چنگا لگدے جیہرلے او قنون زمین نال کتھائیں نہ کتھائیں جڑیا پیا ہووے، نہ تاں او قانون غیر مقامی ہوسی، فطرت ساکوں ہر شئے ڈس ڈتی اے، جیہری وسوں تے قدرت جیہرا بوٹا پیدا کیتے او اوں وسوں دے مزاج دے مطابق ہوندے، موسم وی تے اتھاں راہونڑ آلے لوک تے غذا وی مقامیت دی علامت بنڑائنس۔ اساں تاں آپنڑی وسوں نال وسدے ہاسے، وت ہک ریاست بنڑی، او ریاست ہنڑ ساڈے کنوں مطالبہ کریندی اے جو تساں اویں ٹرو جیویں اساں آکھوں، تہاڈا اٹھنڑ باہونڑ سارا کجھ ساڈی مرضی دے مطابق ہوونڑاں چاہیدا ہے، ہزاراں سالاں توں تساں ایں وسوں نال جڑت رکھدیں ہویں مقامی نظام فطرت تے بنڑائی کھڑو، اے نظام غلط ہے، باقاعدہ وسوں کوں کتابیں اچ مندے ڈتے گئین، مقامیاں کوں جاہل ثابت کیتا گئے، لباس، زبان، تہوار سبھ کجھ غیر مقامی مسلط کر تے ریاست ساڈے اتیں ہتھو الزام لایا جو اساں تہاڈی حفاظت کریندے پیوں، تے تساں ساڈے غدار ہوے۔ تساں میلے کیوں کریندو؟ تہوار آپنڑی مرضی دے کیوں منیندو؟

ساکوں خواباں وچ وی ریاست دڑکے ڈیوے

ولا ہک بہوں وڈی مصیبت ساڈے اتیں غیر مقامی نصاب مسلط کیتا گئے، جیہرا نہ ساڈی زبان دی نمائندگی کریندے نہ ساڈی وسوں دی۔ نکے بال کوں ٹی وی پروگرام توں گھن تے مذہبی نشست تائیں سبھ توں پہلے آپنڑی شدت پسند سوچ مسلط کرنڑ سانگے تیار کیتا گئے، بال سکول پج گئے تاں ہوکوں بندوخ جنگ فساد نال متعارف کرایا گئے، اوکوں ڈسیا گئے جو اے تیڈی زندگی ہوونڑی چاہیدی ہے، ساڈی پالیسی تے زندگی دیاں گزاران رکھ تے چلنڑا پوسی، اوندی باقاعدہ ذہن سازی کر تے اوکوں اے ڈسیا گئے جو تیڈے نال جیہرا اختلاف رکھدے اوکوں زندہ راہونڑ دا کئی حق کینی، تے تیڈی سوچ خدا اسمانوں ڈوا پٹھی اے، ہنڑ تیں کہیں دی گالھ برداش نئیں کرنڑی۔ اج ہک خبر سنڑ تے میڈی روح ڈاڈھی ڈر گئی اے، ہک طالبعلم آپنڑے استاد کوں قتل کر ڈتے، قتل کرنڑ دی وجہ مذہبی اختلاف ڈسایا ویندا پئے، ریاست کوں ہوندی پالیسی کامیاب تھیونڑ تے مبارخ باد ڈتی ونجنڑی چاہیدی اے، تے اوں نینگر کوں سرکاری طور تے ایوارڈ ڈتا ونجنڑا چاہیدا ہے، تاکہ پوری دنیا کوں اساں آپنڑاں پوزیٹو امیج ڈکھال سگوں، تے اوں استاد کوں قبر اچو کڈھ تے ولا ہک دفعہ پھاسی ڈتی ونجے، تاکہ او خدا کوں ایں نہ آکھ سگے جو میں بے گناہ ماریا گیا ہم، ایندے نال ہک تاں ساڈا مورال ہائی تھیسی، ڈوجھا سفارتی سطح سے اساں آپنڑی کامیابی دے دول ای وجا سگسوں۔ مظہر حسین