قرار داد دائرہ دین پناہ ضلع لیہ

6 جون 2021ءچ کوں ضلع لیہ دے شہر دائرہ دین پناہ وچ "سرائیکی صوبہ پُچھ پرتیت" دے ایجنڈے ہک سرائیکی کٹھ تھیا۔ جیندے وچ سرائیکی تحریک دے کارکنیں شرکت کیتی۔ گالھ مہاڑ دے وچ ہک قرارداد پیش کیتی گئی۔ جیندے وچ اے مطالبے سامنہے رکھئے گئے۔

دائرہ دین پناہ دے سرائیکی کٹھ دیاں قرارداداں:

•  25  جولائی،  2021  کوں  پنجاب وچ ننویں صوبہ دے انتخابی وعدے کوں ترائے سال پورے تھیسن۔ ایں سانگے حکومت اڄاں کجھ وی نئیں کیتا۔ 25  جولائی کوں سرائیکی وسیب وچ "صوبہ جوابدھی ݙیہاڑا " منایا ویسی۔ ہر جاہ کٹھ ، مظاہرہ، بیٹھک، ڳالھ مہاڑ تے پوسٹر، لیفلٹ تے پینافلیکس لائے ونڈے ویسن۔

• سرائیکی وسیب خاص کر چولستان تے تھل دے زمینیں دی الاٹ منٹ فوری بند کیتی ونڄے۔ اتھوں دے رکھوکھ اتیں مقامی آبادی دے تاریخی حقوق منیے ونڄن تے بے دخلیاں فوری بند کیتاں ونڄن۔

• پچھلے پنجاب بجٹ وچ اعلان تھیا ہئی جو سرائیکی وسیب کیتے مختص ترقیاتی بجٹ دی "رِنگ فینسنگ" کیتی ویسی۔ اے ہک کوڑا وعدہ ہئی۔ ایں بجٹ وچ سرائیکی وسیب وچ  پچھلے بجٹ سال خرچ تھیوݨ آلے ترقیاتی فنڈز دا انج حساب کتاب جاری تھیوے جو کھیر پاݨی انج تھی ونڄے۔

• ایں بجٹ وچ سرائیکی وسیب دا انج بجٹ پیش کیتا ونڄے تے اوندی مانیٹرنگ دا طریقہ کار وی واضح کیتا ونڄے۔ سرائیکی وسیب نال ایں سانگے دود پلال بند کیتا ونڄے۔

• سرائیکی پاکستان دی لِنگوا فرانکا ہے۔

• ایم پی اے علی حیدر گیلانی دی پاسیوں سرائیکی کوں پنجاب اسمبلی دی پارلیمانی زبان بݨاوݨ دی قرارداد فوری پیش تے پاس کیتی ونڄے۔

• سرائیکی کالجیں وچ سرائیکی لیچکررز دیاں سیٹیں وچ اضافہ کیتا ونڄے۔ ہر بوائز تے گرلز کالج وچ ہک سیٹ مختص کیتی ونڄے۔

• سی ایس ایس وچ سرائیکی ٻولی کوں سبجیکٹ دے طور شامل کیتا ونڄے۔

• پرائمری ایجوکیشن ماء ٻولی وچ ہووے تے ایں سانگے لینگوئیج پالیسی بݨائی ونڄے۔

• سرائیکی وسیب وچ شش ماہی نہریں کوں ٻارانہہ ماہی کیتا ونڄے تے پنجاب اندروں سرائیکی وسیب دے پاݨی دے شئیر کوں ودھایا   ونڄے۔