فاطمہ بُھٹّو

فاطمہ بھٹو ٢٠١٩ء وِچ ہِک تقریب دے وِچالے

فاطمہ بُھٹّو (اردو: فاطمہ بھٹو) (انگریزی: Fatima Bhutto) (ڄَمَّݨ دی تَرِیخ: ٢٩ مئی ١٩٨٢ء) ہِک پاکستانی مصنف زنانی، شاعرہ اَتے کالم نگار ہِن۔ جیڑھی پاکستان، امریکہ اَتے برطانیہ دے اَنجو انج اخباراں وِچ کالم وی لکھین٘دی ہِن۔ فاطمہ بُھٹّو ٢٩ مئی ١٩٨٢ء کُوں افغان دارالحکومت کابل وِچ اُوں ویلے ڄَمّی ہَن، جِہڑیلے اِنّھاں دے اَبّا سئیں میر مرتضیٰ بُھٹّو دیس نکالی دی حیاتی لنگھین٘دے پئے ہَن۔

ٹَٻَّر دا احوال

فاطمہ بُھٹّو پِچھوکڑ صدر اَتے پِچھوکڑ وزیرِ اعظم پاکستان ذوالفقار علی بُھٹّو دی پوتری جاں جو پِچھوکڑ وزیرِ اعظم پاکستان بے نظیر بُھٹّو دی بھتریڄی ہِن جاں جو اَمّاں سئیݨ فوزیہ فصیح الدین بُھٹّو افغان وزارتِ خارجہ اہلکار دی دِھی ہِن۔ مترائی اَمّاں غنویٰ بُھٹّو ٢٠٢١ء وِچ پاکستان پیپلز پارٹی (شہید بُھٹّو) دی چئیر پرسن ہِن۔ فاطمہ بُھٹّو دے اَبّا سئیں میر مرتضیٰ بُھٹّو ١٩٩٦ء وِچ اپݨی بھیݨ بینظر بُھٹّو دے دورِ حکومت وِچ قتل تھئے۔ فاطمہ دے ڄَمَّݨ دے ویلے اِنّھاں دے اَبّا ضیاء الحق دے آمرانہ دور وِچ دیس نکالی دی حیاتی لنگھین٘دے پئے ہَن۔ اِنّھاں دے ماپیاں دے وِچالے شادی دے ترے ورھیاں بعد ای طلاق تِھی ڳئی۔ طلاق دے بعد فاطمہ بُھٹّو اپݨے پِیؤ دے نال کئی مُلخاں وِچ رہن٘دی رہی۔ ١٩٨٩ء وِچ فاطمہ دے پِیؤ دی ملاقات غنویٰ بُھٹّو نال تھئی جیڑھی ہِک لبنانی بیلے رقاصہ ہَن اَتے شام وِچ دیس نکالی دی حیاتی لنگھین٘دی پئی ہَن۔ فاطمہ بُھٹّو غنویٰ بُھٹّو کُوں اپݨی حقیقی اَمّاں آلی کار سمجھین٘دی ہِن، اِنّھاں دے مترائے بِھرا ذوالفقار علی بُھٹّو جونئیر سان فرانسسکو وِچ ہِک فنکار ہِن۔

تعلیم

فاطمہ بُھٹّو نے ابتدائی تعلیم دمشق (شام) وِچ حاصل کِیتی۔ ١٩٩٣ء وِچ اپݨی اَمّاں غنویٰ بُھٹّو اَتے نِکّے بِھرا ذوالفقار بُھٹّو جونئیر دے نال پاکستان آ ڳئی۔ اِنّھاں نے کراچی امریکن سکول تُوں او لیول کِیتا، وَل ٢٠٠٤ء وِچ کولمبیا یونیورسٹی، نیو یارک تُوں امتیازی نمبراں نال گریجویشن کِیتا۔ گریجویشن وِچ اِنّھاں دا خاص مضمون مشرقِ وُسطیٰ وِچ ٻولی ون٘ڄݨ آلی زباناں اَتے کلچر ہئی۔ ٢٠٠٥ء وِچ اِنّھاں نے سکول سکول آف اورینٹل اینڈ افریقن سٹڈیز (یونیورسٹی آف لندن) تُوں "جنوبی ایشیائی حکومت اَتے سیاسیات" وِچ ماسٹرز کِیتا، جین٘دے وِچ اِنّھاں نے پاکستان وِچ تحریکِ مزاحمت اُتے اپݨا مقالہ لِکّھیا۔

تصنیفاں

1. ١٩٩٧ء وِچ پندرہاں ورھیاں دی عمر وِچ فاطمہ بُھٹّو دا پہلا شعری مجموعہ آکسفورڈ یونیورسٹی پریس پاکستان تُوں چَھپّیا ہئی جین٘دا مُکھ "صحرا دی سرگوشیاں" (Whispers of the Deserts) ہئی۔
2. ٢٠٠٦ء وِچ ݙوجھی کتاب ٨ اکتوبر ٢٠٠٥ء کُوں ازاد کشمیر اَتے صوبہ سرحد وِچ آوݨ آلے بُھئمٻ دے موضوع اُتے "8:50am October 8, 2005" دے مُکھ نال چَھپّی ہئی۔
3. تِرِیجھی کتاب "رَت تے تلوار دے گِیت (Songs of Blood & Sword)" دے ناں نال چَھپّی۔

ذاتی حیاتی اَتے دلچسپیاں

اپݨے مذہبی عقیدے دے بارے وِچ، فاطمہ بُھٹّو نے ہِک انٹرویو وِچ آکھیا ہئی جو اُوہ ہِک ثقافتی مسلمان ہِن اَتے آپ کُوں سیکولر سمجھین٘دی ہِن جاں جو اُوہ مسلماناں اَتے اسلام نال جذباتی لاڳ رکھین٘دی ہِن۔

فاطمہ بُھٹّو نے اَݨ ڳِݨت موقیاں اُتّے اسلام دا دفاع کِیتا اَتے مسلم زنانیاں دے بُرقع پاوݨ دے حق دی وی حمایت کِیتی۔