عنایت حسین بھٹی

عنایت حسین بھٹی

عنایت حسین بھٹی (اردو: عنایت حسین بھٹی) (انگریزی: Inayat Hussain Bhatti) (ڄَمَّݨ دی تَرِیخ: ١٢ جنوری، ١٩٢٨ء – فوت تِھیوݨ دی تَرِیخ: ٣١ مئی، ١٩٩٩ء) پاکستان نال تعلّق رکّھݨ آلے مہان٘درے فلمی لوک ڳائیک اَتے فلمی ڳائیک، کمپیئر، اداکار اَتے سیاست دان ہَن۔

حیاتی دا اَحوال

عنایت حسین بھٹی ١٢ جنوری، ١٩٢٨ء کُوں ضلع گجرات، برطانوی ہند (موجودہ پاکستان) وِچ ڄَمّے ہَن۔ اِنّھاں دی فلمی حیاتی دا اَغاز ڳائیک دے طور تے تِھیا اَتے فلم "ہیر"، "پھیرے"، "لارے" اتے "شمی" وغیرہ وِچ اِنّھاں دے ڳائے ہوئے نغمے ٻہوں مقبول تھئے ہَن۔ ١٩٥٣ء وِچ فلمی "شہری بابو" وِچ ہِک فقیر منش سائیں دا کردار ادا کِیتا جین٘دے تے اِنّھاں دا ای ڳایا ہویا نغمہ "بھاڳاں والیو نام جپو، مولا نام" فلم بند تِھیا اَتے وَل اِیہو نغمہ اِنّھاں دی سُن٘ڄاݨ بݨ ڳیا۔

١٩٥٥ء وِچ شباب کیرانوی نے اپݨی فلم جلن وِچ اِنّھاں کُوں مرکزی کردار ادا کرݨ دی پیشکش کِیتی۔ اِین٘دے بعد اِنّھاں نے ہِک لَمّے عرصے تئیں فلماں وِچ مرکزی کردار ادا کِیتا۔ اِنّھاں دی اداکار دے طور تے فلماں دی کُل ڳِنتری ٥٤ ہئی جین٘دے وِچ ٥٢ فلماں پنجابی زبان وِچ بݨائی ڳئیاں ہَن۔ عنایت حسین بھٹی دی اَخِیرلی فلم "عشق روگ" ١٩٨٩ء وِچ نمائش پذیر تھئی۔

عنایت حسین بھٹی نے ١٩٨٥ء دے عام چوݨاں وِچ قومی اسمبلی دی ہِک نشست اُتّے چوݨ لڑیا ہئی جاں جو کامیاب نہ تِھی سڳے ہَن۔ پاکستان دے مہان٘درے فلمی اداکار کیفی اِنّھاں دے بِھرا، ٹیلی ویژن دے مہان٘درے فن کار وسیم عباس اِنّھاں دے پُتر اَتے ٹیلی ویژن دے ای ہِک ٻئے اداکار آغا سکندر اِنّھاں دے ڄن٘واترے ہِن۔

وفات

عنایت حسین بھٹی ٣١ مئی، ١٩٩٩ء کُوں ضلع گجرات، پاکستان وِچ فوت تِھی ڳئے۔