عبداللہ عرفان سئیں

عبداللہ عرفان ہک بھاری تے ڳاڄ ڳڄݨ آلے الاء دے مالک ہن ۔۔۔ نہ صرف ترقی پسند سوچ دے لکھاری ہن بھل فوجی آمرایوب دے پہلے مارشل لآ کنوں لا ضیاء مردود دے مارشل لاء دے خلاف جدوجہد کرݨ آلے ہک سیاسی کارکن ہن ـ ضیائی کالے دور ءچ ملک صاحب اپݨی قیمتی کتاباں دی لابریری بکساں صدوقاں ءچ بند کرتے دوستاں سنگتیاں دے گھراں ءچ رکھوا آئے تے روز ڄہاڑے کہیں کرنل تے کݙاہیں میجر کنیں سوال جواب کیتے سݙا ویندا ہا۔ او سرائیکی تحریک ءچ سرائیکی صوبے دی جدوجہد کوں وسیب دی پہلی تے بنیادی جیت تصور کریندے ہن تے قومی سوال کوں پاکستان ءچ طبقاتی جدوجہد نال جوڑ تے ݙہکھدے ہن۔ انہان کیتے سرائیکی ادب دے لکھاری شاعر ادیب فنکار تے شاگرد ءی دراصل بنیادی سیاسی کارکن ہن جنہاں اڳوں ونڄ تے سرائیکی وسیب دی قومی تے طبقاتی جدوجہد دی وڈی تحریک کوں جنم ݙیوݨیں جیندے ءچ سرائیکی جاگیرداراں سرمایا داراں کوں ہک ڄہاڑے سارے سرائیکی وسیب دے اڳوں ڳوݙے نیواوݨے پوسن کیوں جو سرائیکی تحریک پسماندہ تے غریب عوام دے نچلے طبقات دی تحریک ء۔

ملک صاحب جوشیلے مقرر ہن تے ھمیشہ عوامی انقلاب ءچ یقین رکھیندے ہن۔ سرائیکی ادب بارے مُنڈھلا ایرا ٻدھݨ کیتے وستیاں ءچ سرائیکی ٻولی دے مردے بُھردے مُکدے اکھراں، قصے، پدے پہاکے اکھاݨ، حال حویلے شارتاں، الارے تے ٻولاریاں تے یقین کریندے ہن جوسرائیکی ادب اڄ وی ٻُݙھڑیاں دی ہاں دی کوٹھڑی ءچ سانبھے لاتھن، ڄہڑے اڄ موئے تے بھانویں کل۔۔تہوں انہاں آپ وی سرائیکی ادب دا مُنڈھ پُراݨے لوک قصیاں ءچوں کݙھ تے نویں اجوکے قصہ دا پہلا ایرا سرائیکی ادب ءچ ٻدھا۔۔۔ایندے نال نال ءی انہاں اپݨے آسوں پاسوں دی وݙی تہذیباں دی تاریخی نظریاتی جدوجہد کوں سرائیکی لوکاں تئیں نشابُر کیتے چین روس ترکی تے مصر دے انقلابی کرداراں اُتے کتاباں دے تراجم سرائیکی زبان ءچ کتن جو وسیب کوں اپݨی جاری سیاسی قومی جدوجہد ءچ روشن خیال تے ترقی پسند قومی جدوجہد دے رستے دا ادراک تے شعور تھیوے ۔۔۔۔۔ شہزاد عرفان