عباس سیفی

عباس سیفی سرائیکی زبان دا شاعر ہے۔

ڄم پل

دیرہ غازی خان نال تعلق ہے۔

نمونہ کلام

غزل

چلو کوئی پتر ہَلدا ہووے ہا وو

اساݙے سݙ دا وَلدا ہووے ہا وو

اڳوں منزل کوئی ہووے یا نہ ہووے

اتھوں تاں راہ نِکلدا ہووے ہا وو

توں بیشک یار پتھر ہونویں ہا پیا

اساݙا ہاں تاں ݙَلدا ہووے ہا وو

وݙا پندھ پئے تے چھالے ٹھر گئے ہن

کوئی انگار ٻَلدا ہووے ہا وو

اندھاری رات ھے، گھر ول جلوں ہا

جے کوئی ساکوں سَنبھلدا ہووے ہا وو

ایݙو دل ہـے ایݙو میں آپ سیفؔی

کتھئیں تاں زور چَلدا ہووے ہا وو

عباس سیفی (دیرہ غازی خان)

غزل

عباس سیفی ڈی جی خان

اے نشہ جے رنگ لانوݨ پئے ونڄے

دل دماغ اکھیں تے آنوݨ پئے ونڄے

اے ناں ہئی معراج میݙی مُونجھ دی

تیکُوں میݙی مُونجھ آنوݨ پئے ونڄے

ایں ناں تھیوے جو ݙیہاڑے حشر دے

رب وی اپݨے ݙُکھ سُݨانوݨ پئے ونڄے

کیا کراں ایجھی طبیعت دا بھلا

ہک ملاپ ءِچ سِک لہانوݨ پئے ونڄے

کیا ݙساواں حال سیفؔی مُونجھ دا

مِل ونڄے روہی تے سانوݨ پئے ونڄے