صوبے تے اعتراض دا جواب

ہنڑیں ہیک پوسٹ پڑھی ہے، فرخ سہیل گوئندی دی، پوسٹ دے لوظ اے ہن:

"صوبے نئی، جاگیراں ونڈو پنجاب نہ ونڈن تے نہ ہی وڈن دیاں گے"

پیھلو تاں اے واضح کر ڈیواں جو تساں ریاست دے بنڑائے پنجاب دی ونڈ دے مخالف ہو، نتاں پنجاب تاں انگریز ونڈ گیا ہا، تاں تساں آپنڑے پنجاب دی ونڈ تیں انگریز سامراج دی چاپلوسی اچ اگو اگو رہ گیو، اوں ویلھے صرف پنجاب ہی ہا جینکوں سبھ توں ڈھیر مسلمان قوم دی فکر ہائی اتے تساں ڈو قومی نظریے دے پرچارک ہاوے، اوں ویلھے تہاکوں پنجاب ڈو نظردے ہن ہیک مسلمان پنجاب تیں بیا ہندو پنجاب، ہنڑ جیہرے ویلھے تساں پنجاب ٹُکوائی بیٹھو تاں وادی سندھ تیں قبضہ کر تیں اونکوں پنجاب دا ٹیگ لا کراہیں آپنڑاں رقبہ پورا کرنڑ چاہندو ؟ میں تاں کجھ پنجابی قوم پرستاں توں اے وی سنڑیم جو اساں کوٹری ،کینجھر تے تھر یعنی موجودہ صوبہ سندھ کوں وی پنجاب دا حصہ سمجھیندے ہیں، شناخت توں وڈی کیہری جاگیر ہوسی ؟ جیکر شناخت جاگیر کائنی اتے تساں جاگیراں دی ونڈ دے وی حق اچ او تے صرف فیڈریشن دے یونٹاں دا مسئلہ ہے تاں وت پنجابی نیشنل ازم دا تڈا وچھیندے ہیں چا ؟ تساں جاگیراں ونڈنڑ دے حق اچ تے صوبے ونڈنڑ دے خلاف او۔ تے ول ڈرامہ کیا دا ہے ؟ اساں کڈھاں وی پنجاب ونڈنڑ دے حق اچ کائنی بلکہ اساں تاں ہزاراں ورہیاں توں سندھو نال جڑی تہذیب دی وسوں توں پنجاب دے قبضہ تروڑنڑ دی گالھ کریندے کھڑے ہیں۔ میکوں بہوں حیرت تھائی اے، مطلب اے تساں کہیں وسوں تے ریاست دے جبر اتے قبضے کوں مکاونڑ دی بجائے اوں وسوں دے وسائل دی ریشو بنڑا کے ونڈ چھوڑو اتے آکھو چا جاگیراں ونڈو صوبے نہ ونڈو؟ مطلب اے تساں ون یونٹ بنڑاون چاہندے او ؟ صرف جاگیر دا مسئلہ ہے تاں وت یونٹ کیوں ہن فیڈریشن دے ؟ وت تساں اے ختم کرو چا، انگریزاں دی ونڈ ویلھے تہاڈا ایمانی جذبہ کہیں کوں سمھنڑ نہ ڈیندا ہا اوں ویلھے جاگیراں ونڈنڑ دا نعرہ کیوں نہ لایا گیا ؟ ہنڑ وی تساں جاگیراں دی ونڈ دی گالھ کر کے آپنڑاں پنجاب بحال کرو، انڈیا آلا پنجاب گھنو، اتھاں محنت کرو، ساڈے اتیں پنجاب دا ٹھپہ لا تیں کڈھاں تساں آپنڑے پنجاب دی ونڈ کوں ڈک نوہے سگدے ایں ریاست کوں ہر وسوں دی گالھ سنڑنی پوسی، پنجاب شالا آباد راہوے، سندھ، سرائیکی وسیب تے بلوچستان مترائے کینی، پنجاب اینجھے ویلھے تاریخی غلطی پیا کریندے جیں ویلھے وسیبیاں دی نظریاتی طاقت بنڑدی پائی اے اوں ویلھے پنجاب سرمایہ دار دی تڈ تیں، اتے ڈڈھپ دی بنیاد تیں ساکوں ہینڑا سمجھ تیں ہٹلر گیری کریندے/ کرنڑ چاہسی تاں ایندا نقصان اونکوں تھیسی، ریاست کوں وی سوچنڑاں چہیدا ہے جو فیڈریشن صرف پنجاب نئیں، ہنڑ گالھ ٹر پائی تاں اساں توڑ جُلسوں۔

میم حسین