شناخت

،،،،،،،،،،،،،،،،،،،، شناخت ،،،،،،،،، بندہ سیانڑا ھا ڈیکھ تے حیران ھا کہ ہک باز کُکڑیں دے کٹھے دانڑے کھاندا کھڑے حالانکہ باز تاں اُچی اڈار کرنڑ ءچ مشہور ھے جنھیں دا شکار کرنڑاں ہس انھیں نال دانڑاں کھاونڑ سمجھ توں باہر ھے، آخر بندے فیصلہ کیتا کہ جیرھا ڈاڈا بڈھڑا ایکوں دانڑے گھتیندا بیٹھے ایں کنیں پچھاں اے کیا ماجرا ھے، ڈاڈے آکھیا ،بابو گال ایویں ھے اے باز نکڑا بچہ ھا جڈاں میں ایکوں زخمی حالت ءچ گھر گھن آیاں اے پہاڑ دے نال پیاء ھا ،میں ایندا دوا داروں کیتا تے ککڑیں دے بچیں نال ایکوں کھڑا ڈتا ہُنڑ تک اے ککڑیں دے نال ھے.

بندے آکھیا ڈاڈا اے باز میکوں ڈے بھانویں مُل نال ڈیویں یا اینویں،، ڈے ضرور میں کجھ تجربہ کرنڑ چاھنداں ،بڈھڑے مہمان سمجھ کے باز جوان کوں ڈے ڈتا.

جوان گھر آ کے باز دے سامنڑے بیھ گیا تے آکھس وائے توں باز ھئیں آپکوں سُنجانڑ تیڈی پرواز آسمان تئیں ھے توں کیوں کُکڑ بنڑیا ودیں ،وت تھوڑی دیر بعد باز کوں چاء کے حویلی دی کندھ تیں چڑھ گیا ،باز کوں تلے سٹیے سی متاں اُڈ پووے، باز کُکڑ آلی کار مونھ پریں ءچ ڈے کے زمین تیں ٹھاہ تھیاء.

خیر جوان محنت نہ چھوڑی کجھ مہینیں دی محنت دے بعد باز کوں چاء کے اُچی پہاڑی تیں چڑھ گیاء اُتھائیں ونج کے باز کوں تلے اُچھلس باز پہلے تاں گچی کھنبیں ءچ ڈتی رکھی جو ھونڑیں زمین تے ڈاھنداں ،جیرلھے اکھ کھول کے ڈیٹھس تاں زمین حالی بہوں پریں ھئ پچھیں سوچس ھُنڑ زندگی موت دا رُولا ھے پچھیں پَر کھول کے اُڈنڑ دی کوشش کیتس تاں آسمان نال گالھیں ہن اوں بندے دے سر دے اُتوں ٹپ کے آکھیس میکوں میڈی سنجانڑ کراونڑ دا شکریہ* اے ساری کہانی میڈی سرائیکی قوم تے فٹ بہندی ھے جیرھی اج تئیں شناخت کنیں محروم ھے ،انھیں کوں حالی تک آپڑیں قدر دا پتہ نیں لگا ،کیوں جو گودیں دا غلامی آلا دانڑا انھیں دے ڈیڈھ ءچ ھے اُنھیں وڈی چالاکی نال بازیں کوں کُکڑیں بنڑا کھڑائے اُو وی کُرک* یاد رکھائے میڈی گال کوں جیویں پچھلیں 71 سالیں کنیں بغیر شناخت دے ودے ھاؤ اگر ایویں ودے ریھ تاں اگلیں ویھ سال تک تھاڈا نام و نشان نہ مٹ گیاء تاں میکوں گُولی مار ڈیوائے صرف ماء بولی بچائ ودے ھاؤ جیرھی ھولیں ھؤلیں مُکدی ویندی ھے کیوں جو اساں تعلیم یافتہ تھیندے ویندے ہیں * صوبہ جنوبی پنجاب تھاڈی گردن تے آخری چُھری ھے اگر چل گئ تساں اساں ایں گال تے سمجھوتہ کر گھدا کہ صوبہ بنڑ ونجے ناں وٹیج پُوسی ،،کائیناں تھاکوں غلط فہمی ھے تھاکوں شناخت دے نال نال ماء بولی کوں وی خدا حافظ آکھنڑاں پُوسی ،کیوں جو تھاڈے وسیب ءچ کجھ نَہر پہلے ہن ،کجھ ہُنڑ آ کے بہندے ودن ،،،،جمیل بلوچ.