شاکرمہروی،لکھت رمضان آرائیں

نظم : "شِکوہ"

میڈا سئیاں جٙنب جٙلال نہ کر ، اٙج کُول کُراڑ کُوں سٙہنڑاں ھے

لٙنگھی مُدت مدام خیال دے وِچ ، اٙج لفظ بنڑیے لٙب ھانڑاں ھے

تیکُوں اٙپنڑی کُل تخلیق وِچُوں ، ھِکو صِرف اِنسان کیوں بھانڑاں ھے

اِیندی رُوح دا رازِق ساہ اِیندا ، تونڑے ساہ ساہ آپ کُمانڑاں ھے

اے زِندگی ویڑھ کے سٙم ویندے ، اِیندی پٙل پٙل موت سِرانڑاں ھے

کوئی لفظ فرشتے نہ لِکھسِن ، تئیں نال اٙج نائب اٙلانڑاں ھے

ھِک سٙڈ دِیاں وٙلدیاں ڈاہ(10) ڈیساں ، کر یاد قُرآن ءچ آکھیا ھئ

ھِک پٙل وی اٙنج نہ تِھیساں مٙیں ، ہوساں نال جہان ءچ آکھیا ھئ

وٙل آپ ڈسا اے ٹٙھہندی ھے اِنسان تُوں ونج اِنسان پِنے ؟

ہر صُورت پنِنڑاں پِننڑاں ھے ، بھانویں شہر یا تئیں دٙر آن پِنے

تیڈا نائب تھی تیڈے ھوندئیں ہوئیں ، چا کاسے تھی گردان پِنے

کڈی نعتاں پٙڑھ پٙڑھ پِندا ھے ، کڈی پڑھ پڑھ کے قُرآن پِنے

تیکوں ڈُکھ نئیں تِھیندا روٹی کُوں ، تیڈا آدم بنڑ حیوان پِنے ؟

تیکُوں پِننڑے بھاندِن حُکم چٙلا ، آوے بھوئیں کولُوں اٙسمان پِنے

ودا پِندے تئیں تُوں اٙنج تاں نئیں ، اِیندی شٙہ رٙگ دے نزدیک ھئیں تُوں !

اِیں رُوپ سرُوپ ءچ آپ ھوویں ، پِِچھے کیا آکھاں بس ٹِھیک ھئیں تُوں !

میکوں ڈس اِنسان دی قِسمت تے کٙھڑ کِھلسِن تارے کے تونڑی ؟

اِیندی قِسمت سٙمسی کے تونڑی ، اِیندے لیکھ جٙگارے کے تونڑی

اے دِھی رانڑی کہیں بابُل دی ، رو رینڑ گُزارے کے تونڑی

پیُو پیٹ پالے یا ڈاج بنڑائے ، ڈس آپ کُوں مارے کے تونڑی

دِھی دِھی تاں ھے بھانویں کہیں دی ھے ، ڈُھوئے سِلھاں گارے کے تونڑی

تیڈی دِھی ہوندی مٙیں پُچھ گِھندا ، ڈیندو کُوڑ دے لارے کے تونڑی

ڈس حٙوا جٙئ تیڈی دُنیا تے بنڑ ناچی کے تئیں نٙچنڑاں ھے ؟

بنڑ مہندی حِرص ہوس دی اِیں اٙجاں چوکھے پیریں رٙچڑاں ھے ؟

میڈی رُوح کُوں پاک پٙوِتٙر کر ، وٙل تٙن جھئیں غارِ حِرا بخشیو

میڈے لٙحظے لٙحظے نال رِیہوں ، میں سوچ شعور حیا بخشیو

میں خاک کُوں خُلق وی دان کیتو ، ساہ ساز دے اٙلا بخشیو

میکُوں دِل جھئیں دولت بخش کرائیں ، بے دھڑک مِزاج سٙخا بخشیو

تُوں آپ اولاد کہیں دی نئیں ، میکُوں پِیُو بخشیو ، میکوں ماء بخشیو

ھُنڑ "شاکر" شر تکرار مُکائوں ، تئیں میکوں نازیں نال بنڑائے

مٙیں بُھل گیا ھاں ، میڈی غلطی ھے ، مٙیں اٙپنڑے کُوں آپ وٙنجائے !!!

میڈا سئیاں جٙنب جٙلال نہ کر ، میڈا سئیاں جٙنب جٙلال نہ کر

(سئیں شاکر مہروی صاحب)