سیاسی پارٹی دا ٻدھل
"سیاسی پارٹی دا بدھل ٻیا کون ہوندے" تھوڑے سچ نال ڈِھگ سارا کُوڑ رلا ، مندھ تے سوہݨا بُت بُتڑا چا بݨاؤ ۔۔۔۔۔ ول لوکاں ءچ کُجھ معجزات کرامات مشہور کرو۔۔۔۔ بھولے سِدھے سادھے دھمال کھیڈسن، نعرے مریسن ، نہ منو تے مرݨ مارݨ تے آویسن ـ شہزاد عرفان
لکھت سئیں مشتاق گاݙی
ذوالفقار علی بھٹو دی حکومت وچ 14-16 مارچ 1975 کوں ہک تاریخ ساز سرائیکی ادبی کانفرس مُلتان وچ تھئی ہئی جیندے وچ بہاولپور تے سرائیکی سُنڄاݨ کوں کٹھا جوڑا ٹھہایا ڳیا تے سرائیکی ٻولی دے سکرپٹ کوں متفقہ بنڑایا ڳیا ۔۔۔ ایں کانفرس وچ ساݙے سارے بزرگ سرائیکی مہاندرے ( مثال کیتے تاڄ محمد لنگاہ، میر حسان الدین حیدری، سیٹھ عبید الرحمان، مہر عبدلحق، مشہزادہ مامون الرشید، برگیڈیر نذیر علی شاہ، افضل مسعود، عبدل نبی کانجو، مختیار اعاوان، اسلم رسول پوری، ارشاد تونسوی، فداحسین گاݙی تے ٻئے ٻہوں سارے) شامل تھئے تے وت سرائیکی تحریک ٻہوں اڳونہاں پندھ کیتا ۔۔۔۔ ایں کانفرس دی چھپی ہوئی رپورٹ میݙے سامہنڑے اے جیندی ترتیب عمر کمال خان ایڈوکیٹ کیتی۔۔۔ ایں رپورٹ دے چھیکڑ وچ سرائیکی دی حمایت وچ جنہیں اہم سیاسی رہنمائیں لکھے ہوئے پیغام بھیڄے او سبھے پاکستان پیپلز پارٹی دی حکومت دے مُہاندرے ہن۔۔۔ مثال کیتے صاھبزادہ فاروق علی خان (سپیکر قومی اسمبلی)، بیگم اشرف عباسی (دپٹی سپیکر قومی اسمبلی) میر احمد یار خان بلوچ (گورنر بلوچستان)، غلام مصطفی جتوئی (وزیر اعلی سندھ)، ممتاز علی بھٹو (وفاقی وزیر مواصلات)، مخدوم زادہ سید حامد رضا گیلانی (سفیر پاکستان کینیا)، اشفاق احمد خان (سفیر ویت نام)، محترمہ عابدہ حسین (ایم پی اے) ۔۔۔۔ جے اے سرائیکی کانفرس نہ تھیندی تاں سرائیکی شناخت دا پندھ ٻہوں کھوٹا تھی چکیا ہوندا۔۔۔ وت اے ذوالفقار علی طھٹو دا دور ہئی جݙاں ملتان، بہاولپور تے ڈیرہ اسماعیل خان وچ یونیورسٹیاں بنڑیاں۔۔۔ اوندے بعد اڄ تائیں پنجاب حکومت ہک وی یونیورسٹی نئیں بنڑن ݙتی۔۔ ریڈیو سٹیشن قائم تھئے، ہر ضلع وچ کالج بݨائے ڳئے۔۔۔ زون اے تے بی دی ونڈ کر کنیں سرائیکی لوکیں کیتے ملازمتیں دا کوٹہ انج کیتا جینکوں ولا ضیا دور وچ غیر آئینی طور تے مُکایا ڳیا۔۔ جݙاں بی بی دی پیلھی حکومت بنڑی تاں وت زکریا تے اسلامیہ یونیورسٹی وچ سرائیکی زبان دے ڈیپارٹمنٹ قائم کرنڑ کیتے گورنر پنجاب نے نوٹیفکیشن جاری کیتا ۔۔۔۔ اپنڑی اڳلی حکومت وچ سرائیکی وسیب دے فاروق لغار کوں صدرِ پاکستان بنڑایا تے اوں وت پچھوں کنڈھ وچ اوں ویلھے چُھرا ماریا جݙاں بی بی دا بھرا مرتضی بھٹو کراچی دی سڑک تے لاوارث وانگوں قتل تھیاپیا ہئی۔۔ یوسف رضا گیلانی کوں سپیکر قومی اسمبلی بنڑایا تے اُنہیں قومی اسمبلی وچ بے تحاشا سرائیکی ملازم بھرتی کیتے تے اوندی پاداش وچ چھی سال کنیں ودھ جیل کٹی۔۔۔ وت جݙاں 2008 وچ پیپلز پارٹی دی حکومت بنڑی تاں سرائیکی وسیب کنیں پیر فرید دی یاری نبھاونڑ دا ریت پال ایں یوسف رضا گیلانی کوں وزیر اعظم بنڑایا ڳیا جئین ٻہوں عرصے بعد مُلتان دی شکل بدل ݙتی۔۔ سرائیکی صوبہ دا بل سینیٹ کنیں پاس کروایا ۔۔۔ زکریا یونیورسٹی وچ سرائیکی ایریا ریسرچ سنٹر دی شاندار بلڈنگ بنڑوائی ۔۔۔ مُلتان وچ پاکستان ٹیلیویزن دا سنٹر بنڑایا ۔۔۔ وت انہیں ساریں جرائم دی پاداش وچ متعصب افتخار چوہدری دی عدالت وچوں سزا یافتہ تھیا۔۔۔ اوندا پُتر اغوا تھیا ۔۔۔ ایہا پیپلز پارٹی اے جئیں جولائی 2016 وچ سینیٹ وچ ست زبانیں دا بل پیش کیتا تے سبھے پیپلز پارٹی دے سینیٹرز اوں بل دی حمایت وچ ووٹ ݙتا ۔۔۔۔جݙاں جو ن۔ لیگ تے پی ٹی آئی دے سینیٹرز ایں ست زبانین دے بل دی کُھل کے مخالفت کیتی۔ قومی زبانیں دے بل دے حوالے نال اڄاں ٻہوں کُجھ اڳوں تھیونڑے تے اڄ جیڑھے لوک جوش وچ پیپلز پارٹی اُتے فرد جُرم عائد کریندے کھڑن او کل شرمندہ تھیسن ۔۔۔۔ چھیکڑ وچ ایہو آکھساں جو وت نام نہاد سرائیکی قوم پرستیں دی اکثریت کیا کیتا ۔۔۔ آصف زرداری تے یوسف رضا گیلانی دے پُتلے ساڑے ۔۔۔ اُنہیں کوں مندے کڈھے ، لوکیں کوں کنفیوز کیتا، تخت لہور دی چاپلوسی کیتی تے وت اپنڑی چھوٹی انا دی تسکین کیتے پُھنڈیج کے ٻہے ڳئے جو مارکا وݙا معرکہ مار گیدھے سے ۔۔۔۔ جے سرائیکی وسیب انہیں دے شر کنیں بچ ڳیا تاں سرائیکی صوبہ ضرور بنڑسی ۔۔۔ وسدے رہو
شہزاد عرفان