سَوَرن بترہ
محترمہ سورن بترہ سئیݨ دی یاد وچ
محترمہ سورن بترہ جی دا جنم سرائیکی وسیب دے شہر علی پور وچ 7 اپریل 1945 وچ تھیا انہاں دے والد شری کنول نین بھگت اتے والدہ شریمتی گنیشی دیوی تقسیم دے بعد ہندوستان وچ ٹر ڳئے جتھاں انہاں دے والد نے سول سروس جوائن کر گھدی اتے ہندوستانی پنجاب اتے ہریانہ وچ بطور سول سرونٹ اپݨی خدمات سر انجام کیتیاں.
محترمہ سورن بترہ دی شادی 26 جون 1970 کوں ہندوستان دے عظیم سرائیکی اڳواݨ بیرسٹر بترہ نال تھئی اتے او ایں سال اپݨیاں دھیاں نال اپݨی شادی دی گولڈن جوبلی اتے اپݨی ݙوہتری دی گریجویشن دی تقریب سیلیبریٹ کرݨ کیتے کینیڈا دے شہر Vancouver وچ مناوݨ دا ارادہ رکھیندے ہن مگر تقدیر دے لیکھ وچ اینوے منظور کئیناں ہا.
محترمہ سورن بترہ نے سوگواراں وچ اپݨے شوہر دے علاوہ پنج دھیاں چھوڑن.
محترمہ سورن ہک ٻہوں مہربان اتے شفیق انسان ہن سماجی طور تے ٻہوں ایکٹو راہندے ہن. اپݨے پئے بیرسٹر جگدیش چندر بترہ دی تنظیم "سرائیکی سہتیہ سنگم" اتے میگزین"سرائیکی انٹرنیشنل" وچ بھرپور حصہ گھندے ہن اتے متعدد سرائیکی سیمینار اتے مشاعریاں دی منتظم وی ہن. متعدد سماجی اداریاں نال منسلک ہن اتے ادنیا دے کئی ملخاں دے سفر کر چکے ہن.
محترمہ سورن بترہ صاحبہ دا کجھ ݙینھ پہلے 12 جون 2020 کوں انتقال تھیا انہاں کیتے میموریل سروس دا انتظام انیہاں دے نیو دہلی وچ گھر"کنج آنند"( یعنی کونجاں دا آلھݨاں) وی تھیا کرونا دی وجہ توں محض گھر دے فرد اتے چند قریبی عزیز سݙے ڳئے اتے سوشل میڈیا تے ایں سروس دے لائیو ویو دا انتظام کیتا ڳیا اتے دنیا بھر توں انہاں دے عزیز و اقارب ورچؤلی شریک تھئے.
محترمہ سورن بترہ نے ہندوستان دے دورے آنوݨ آلے بیشمار لوکاں دی میزبانی وی کیتی چند مشہور شخصیات وچ نواب صلاح الدین عباسی، اسحق خاکوانی، میاں عبدالستار، عطاءاللہ عیسی خیلوی، بیرسٹر تاج خان لنگاہ، عبدالمجید کانجو اتے ٻئے ہائی پروفائیل سیاستدان، وکلاء، سفارتکار، ادیب وغیرہ( جنہاں دا میں بوجوہ ناں نی مینشن کریندا پیاں) شامل ہن.
بندہ ناچیز کوں وی پہلی سرائیکی انٹرنیشنل کانفرنس دے موقع تے انہاں دی مہمان نوازی دا شرف حاصل ریہے.
ٻہوں اچھے اتے محبت کرݨ آلی خاتون ہن، میݙے ٻال ٻچیاں دی ہمیشہ خیر صلہ پچھدے ہن.
90 دے ݙہاکے وچ بیرسٹر بترہ جیہرے سارک دی نمائندگی کریندے پئے ہن انہاں نال پاکستان تشریف گھن آئے اتے سرائیکی وسیب دے متعدد شہراں دا دورہ کیتا اتے میݙی خوش قسمتی ہائی اساݙے شہر خانپور وچ جو محترمہ سورن بترہ دی میزبانی دا شرف اساکوں حاصل تھیا. اساݙے گھر وچ خواتین دا ٻہوں وݙا میل/کٹھ تھیا اتے محترمہ سورن بترہ نے ٻہوں پرخلوص تآثر چھوڑیا محلہ دیاں خواتین پہلی واری ہک ہندوستانی خاتون کوں سرائیکی الیندا ݙیکھ کے ٻہوں حیران ہن. ایں موقع تے انہاں پچھیا جو علی پور اتھوں کتلی پرے اے انہاں دا دورہ کیونجو ٻہوں مختصر ایں سانگے انہاں کوں علی پور گھن ونڄݨ ممکن نہ ہا مگر انہاں دی فرمائش تے علی پور دے مشہور انار پیش کیتے ڳئے جیہرے کہ محترم مجاہد جتوئی صاحب نے کمال کریندے ہوئے چند گھنٹیاں وچ منگواتے انہاں کوں پیش کیتے انہاں علی پور دے اناراں کوں چمیاں وسیب اتے اپݨی جنم بھومی نال محبت دا اے شاندار منظر ہائی.
محترمہ سورن بترہ صاحبہ دا کجھ ݙینھ پہلے 12 جون 2020 کوں انتقال تھیا انہاں کیتے میموریل سروس دا انتظام انیہاں دے نیو دہلی وچ گھر"کنج آنند"( یعنی کونجاں دا آلھݨاں) وی تھیا کرونا دی وجہ توں محض گھر دے فرد اتے چند قریبی عزیز سݙے ڳئے اتے سوشل میڈیا تے ایں سروس دے لائیو ویو دا انتظام کیتا ڳیا اتے دنیا بھر توں انہاں دے عزیز و اقارب ورچؤلی شریک تھئے.
دعا اے رب کریم بابائے سرائیکی بیرسٹر جگدیش چندر بترہ. اتے انہاں دی فیملی کوں صبر جمیل اتے مرحومہ دی بخشش فرماوے اتے جنت الفردوس وچ اعلی مقام عطا فرماوے
آمین
عبید خواجہ
نوٹ اے تصویر مسٹر اینڈ مسسز بترہ دے سرائیکی وسیب دے دورہ دے موقع تے خانپور کٹورہ وچ چھکی ڳئی اے اتے پچھلی لائین وچ محترمہ سورن نال سڄے پاسے میں کھڑاں.
تصویر وچ ٻیٹھے ہوئے
سڄے کنوں کھٻے
محترمہ سورن بترہ، بیرسٹر بترہ، سید زاہد شاہ بخاری، نعیم عباس انہاں دی جھولی وچ ٻال غالبا مجاہد جتوئی صیب دا اے.
کھڑے ہوئے سڄے کنو کھٻے
عبید خواجہ، بیربل داس، ݙاہڑی آلے صاحب دا ناں نی یاد، طارق خان جتوئی ایڈووکیٹ، رفیق احمد، حبیب اللہ خیال، سلور سٹار پریس آلے دھریجہ صیب،بخاری صیب ناں نی آندا مگر اتنا یاد اے جو او "دھاں" دے ناں تے سرائیکی رسالہ وی کڈھیندے ہن.