سرائیکی وسیب اُتے یونانی اثرات

سرائیکی دے ایندے نیڑے نیڑے دے علاقیاں گھٹ وگھٹ ݙو سو سال تائیں یونانیاں دے قبضے وچ ریہے ہن۔ ایندے باوجود سرائیکی وسیب تے یونانی اثرات ٻہوں تھوڑے ہن۔ سِکیاں تے ہک پاسے یونانی عبارت لکھی ویندی ہئی۔ بعد وچ اتھوں دی مقامی زبان وی لکھی ویندی ہائی۔ اتھوں دے لوک یونانی کوں اُکا کائناں ڄاݨدے ہن۔ سرائیکی تہذیب وتمدن دا بنیادی طور تے کوئی اثر کائنی تھیا۔ یونانی علوم وفنون کوں وی ایں علاقے آلیْاں اصلوں نہ مَنیا۔ اکثر یونانی حکمران ٻُدھ مذہب دے پیروکار بݨ ڳئے۔ اتے ٻُدھ مذہب دیاں تعلمات کون ودھیندے ریہے۔ ایں سانگے سرائیکی تہذیب وچ یونانی اثرات اِٹٖے وچ لوݨ دے برابر ہن۔ سرائیکی وسیب وچ یونانی اثرات صرف گندھارا آرٹ تائیں محدود ریہے ہن۔ یا وت یونانی زبان دے کجھ الفاظ سرائیکی وچ آرلے ہن۔ کجھ الفاظ سائنس دے ذریعے انگریزی کنوں آئے ہن۔