سرائیکی قومیتی تحریک تے موجودہ صورتحال
سرائیکی قومیتی تحریک تے موجودہ صورتحال "ہک گزارش"
گزشتہ چند مہینیاں توں سرائیکی تحریک دے اڳواݨ اتے کارکن زیادہ تر خاموش ہن. اوندی وجہ حالیہ الیکشن وی تھی سڳدن، کیونجو الیکشن دے دوران آپوں آپݨے مفادات سانگھے دوست پینل بݨائی کھڑے ہن. جینویں جو دوست ڄاݨدن اے الیکشن سرائیکی وسیب کیتے ٻہوں اہم ہن کیونجو وسیب دے لوکاں پی ٹی آئی کوں علیحدہ صوبہ بݨاوݨ اپݨے منشور دا حصہ بݨایا. اے ہک علیحدہ بحث ھ جو تحریک انصاف جنوبی پنجاب اتے اکثریتی سرائیکی عوام قومیتی شناخت موجب صوبہ سرائیکستان چاہندن. الکشن اتے محرم دی وجہ توں سیاسی سرگرمیاں نہ ہووݨ دے برابر ہن.
دوستو! سرائیکی وسیب اتے قوم تاریخ دے اہم تریݨ موڑ توں لنگھدی پئی اے، جیکر ایں موقعہ تے صحیح فیصلہ اتے قدم نہ چاتا ڳیا تاں تاریخ اساکوں معاف نہ کریسے. مئی وچ انٹر نیشنل سرائیکی کانگریس دی طرفوں سرائیکی اتحاد سانگھے خانپور ہک کٹھ کرایا ڳیا جیہرا ٻہوں کامیاب ریہا.
ایں موقع تے سرائیکی قومیتی تحریک دے ودھارے کیتے راقم الحروف دی تجویز تے سرائیکستان قومی رابطہ کمیٹی بݨائی ڳئی اتے سئیں اکبر انصاری صیب اوں کمیٹی دا کنوئینر میں ناچیز کوں نامزد کرݨ دی تجویز کیتی جیہری ٻے اڳواݨاں نے وی تائید کیتی میں شکریہ نال معذرت کیتی جو ملک توں مستقل ٻاہر راہݨ دی وجہ توں ایں ذمہ داری کوں نہ نبھا سڳساں. میں ایں موقعہ تے سئیں پروفیسر عامر فہیم صاحب دا ناں تجویز کیتا جیہرا سرائیکی قومیتی تحریک دے اڳواݨاں سئیں اکبر انصاری، مجاہد جتوئی، عاشق بزدار، صوفی تاج گوپانگ، راݨا فراز نون، ظہور دھریجہ، اجمل مسݨ، شاہنواز مشوری، عثمان کریم بھٹہ، ارشاد امین، راشد عزیز بھٹہ، مظہر سعید گوپانگ سمیت اجلاس دی اکثریت نے تائید کیتی اتے محترم پروفیسر عامر فہیم صاحب کمال مہربانی فرمیندے ہوئیں نے ایں ذمہ داری کوں قبول کیتا..
اتنی وݙی تمہید دا مقصد اے ہا جو سرائیکستان قومی رابطہ کمیٹی سرائیکستان دے قیام اتے سرائیکی وسیب دے محرومیاں اتے مسائیل دے حل کیتے تشکیل ݙتی ڳئی ہائی اتے ایندے اے حالی وی ایکٹو اتے ورکنگ ھ کیوں نہ ایں پلیٹ فارم کوں دوبارہ سرائیکی وسیب دے وسیع تر قومی مفاد دی خاطر اینکوں ری تشکیل کیتا ونڄے تانجو اجتماعی شعور نال سرائیکی وسیب و عوام دے مسائیل دے حل کیتے جدوجہد جاری رکھی ونڄ سڳے. پہلے مرحلے وچ ایں کمیٹی دے کنوینئر عامر فہیم صاحب کوں بدستور رکھیندے ہوئیں ایندے ممبران دی تشکیل نو کیتی ونڄے. چھی چھی ممبران سرائیکستان صوبہ محاذ اتے سرائیکستان گرینڈ الائینس وچوں اتے ہک ہک ممبر سرائیکی لوک سانجھ دے ݙونہاں دھڑیاں کنوں گھدے ونڄن اتے دانشور، ادیب، لکھاریاں، خواتین سمیت زندگی دے ٻئے مختلف شعبیاں دے مہاندرے لوکاں وی نمائینگی رکھی ونڄے.
دوستو جینویں جو تساں بخوبی آگاہ ہوسو جو میں اپݨی بیشتر زندگی سرائیکی وسیب اتے اڳواݨاں کوں ہک پلیٹ فارم تے کٹھا کرݨ اے .انٹر نیشنل سرائیکی کانگریس ایں سلسہ وچ ہر ممکن اپݨا بھر پور رول ادا کریسے. اساݙا مقصد صرف اور صرف سرائیکی وسیب کوں ہک جھنڈا اتے ہک ایجنڈہ، سرائیکستان دے قیام کیتے ہک پلیٹ فارم تے کٹھا کرݨ ھ. آؤ اساݙے نال تھیوو. جیوے سرائیکی، دوست وی ایں سلسلہ وچ اپݨی تجاویز/صلاحواں ضرور ݙیو. شکریہ
عبید خواجہ، صدر، انٹر نیشنل سرائیکی کانگریس 🇺🇸 [١]