سرائیکی افسانہ: خود کُوزہ
انسانی دماغ وی عجب کرشمہ ہے قدرت دا،اے خود اِی مسٔلہ پیدا کریندے تے خود اِی اوندے حل وچ جُپ ویندے،خود اولے وہندے تے ہمیشہ اپݨیاں تمام خواہشاں تے انہیں کیتے کیتی ڳئی جدوجہد کوں تن دے ذمے لاݙیندے،تن کولوں اپݨیں لوڑیں دے کتیے خوف ݙربَھو پیدا کریندے تے خود اِی اوندا شکار تھی ویندے۔ انسانی جسم تے قابو پاوݨ کیتے جیڑھی ہزاریں سالیں وچ جدوجہد کیتی سی او خود اوندے کیتے عذاب بݨ ڳئی ہے۔ اوں طاقت تے قابو پاوݨ کیتے بندے کوں خود اوندے گُر سکھائے نِس۔ دنیا دے تمام نشے بھانویں اُنہیں دی کوئی شکل ہے بندے دی مت مارݨ کیتے خود انسانی دماغ بݨیے ہوئن۔ پینگھ وی خود ہووے تے جھوٹݨ والا وی خود۔ انسانی دماغ جاڳدا ہووے تاں تن دا کوئی وی عضو اوندی مرضی دے بغیر ہَل نہیں سڳدا۔ کہیں وی آپریشن دے دوران ایہو کجھ کیتا ویندے،بس تھوڑی دیر انسانی دماغ کوں مارݙیو،تُساں سب عذاب ثواب کنوں آزاد تھی ویندے او۔ کینجھیں وجیب ڳالھ ہے جو عقل دے خلاف جتنے دلائل اَڄ تئیں ڳئین او سب عقلی دلیلیں نال ݙتے ڳئین،گویا اپݨے خلاف ہک مقدمہ بݨیندے خود اِی اوندے اِچ گواہ تے خود وکیل بݨدے تے کود اِی جج۔ ایہا وجہ ہے جو صوفیں خود شناسی کوں اِی خدا شناسی آکھئیے،خود اپݨے آپ کنوں واقف تھیوݨ دا مطلب ہے جو عقل دے فریب کاریں کنوں واقف تھیوݨ، ہُݨ ایندا وَٹ کون کڈھسی جو تہاݙا اپݨے آپ کوں سُنڄاوݨ گھنݨ کتھائیں عقل دی فریب کاری تاں نہیں۔ دنیا دے تمام آرٹ،تمام فلسفے،تمام نظریات دی پرکھ دا معیار عقل ہے۔ خود عقل کوں پرکھݨ دا معیار کینویں مقرر کیتا ونڄے۔ اَڄ تک کہیں بندے خود آکھئیے جو میں پاڳل ہا۔ جیڑھے اَڄ تئیں سیاݨے سݙ ویندے آںدن انہیں سب کوں اپݨے وقت اِچ پاڳل سمجھیا ویندا رہ ڳئے۔ ہُݨ تائیں جیڑھیاں ڳالھیں انسانی دماغ ساکوں سمجھائن خود اوندے خلاف دلیلاں گھڑ تے ݙتنیس تے ہُݨ جیڑھی پدھر تے ساکوں گھدی ویندے او جیڑھلے ویلھے غضط ثابت تھئی تاں وَل شاید انسانی دماغ دے آخری حرکت ہووے۔