ست سورمیون

ست سورمیون (سَت سورماں تِرِیمتاں) سندھ دے ست مہان٘درے لوک تِرِیمتاں ہِن۔ جِنّھاں دا ذکر شاہ عبداللطیف بھٹائی دے رسالے شاہ جو رسالو وِچ وݙّی تفصیل دے نال ہِے۔ اِیہ سِندھ وِچ عوامی سطح اُتے ٻہوں مقبول ہِن۔

سَت سورماں لوک ترِیمتاں

شاہ عبداللطیف بھٹائی دی سَت لوک تِرِیمتاں دے ناں تَلّے درج ہِن:

1. مومل (رانا)
2. ماروی (عمر)
3. سوہنی(مہینوال)
4. سسی (پنوں)
5. نوری
6. سورٹھ رائے ڈائچ
7. لیلا

شاہ عبداللطیف بھٹائی نے اِنّھاں سَت تِرِیمتاں دے ذریعے آپݨی شاعری وِچ سندھ دھرتی دی تِرِیمتاں دی بہادری، پِرِیت، وفا داری، استقامت، کردار اَتے ثابت قدمی کُوں لِکّھیا ہے۔

مارئی

مارئی دا کردار دھرتی اَتے رِیتاں دے نال پرِیت اَتے ڄُڑے رَہݨ دی عکاسی کرین٘دا ہِے۔ مارئی نے کُراڑی باشا عُمر یا امر دے سامھݨے سِر نئیں نِوایا اَتے آپݨے انکار نال تَرِیخ رقم کر ݙِتّی۔

مومل

مومل رانو داستان وِچ مومل راٹھور راجھستھان جیسل میر وِچ ہِک شہزادی دا کردار ہِے جیڑھا رانو دے پُر جوش پرِیت اَتے عِشق وِچ سبھ کُجھ وار ݙین٘دی ہِے۔ کَلھیپے، ہجر اَتے غلط فہمی دے جذبیاں کُوں مومل رانو دی کہاݨی وِچ مومل دی زبانی شاہ عبداللطیف بھٹائی نے اِین٘ویں پیش کِیتا ہِے جو اُوہ ہِک لا زوال سندھی کردار بݨ ڳئی۔

سسّی

سَسّی پُنُّوں دی کہاݨی وِچ سسّی دا کردار ہِک اِیہو جئیں با ہمّت اَتے مستقل مزاج چھوہِر دا ہِے جیڑھی آپݨے محبوب کُوں لبھین٘دی ہِے۔

نوری

نوری ہِک مچھیرݨ ہِے جیڑھی باشا تماچن اُتے آپݨی پرِیت دا جادو کر ݙین٘دی ہِے، اِیہ کہاݨی سندھی لوک رِیتاں وِچ پرِیت دی ترجمان بݨ چُکّی ہِے۔

سوہݨی

سوہݨی آپݨے محبوب (مہر) نال مِلّݨ کِیتے دِلّے دی مدد نال تَر تے دریائے سندھ دے ݙوجھے کَنّے وین٘دی ہِے اَتے ہِک ݙین٘ہ دریا دے تِکّھے تغیانیاں وِچ وَیہہ تے پرِیت وِچ حیاتی ہار وین٘دی ہِے۔ سوہݨی مہر نال مِلدی جُلدی لوک داستان سوہݨی مہِین٘وال دی وی ہِے جیڑھی ہِک پنجابی لوک داستان ہِے۔

لیلا

لیلا چنیسر دی لوک کہاݨی چوݙہویں صدی وِچ ٹھٹّھہ، سندھ وِچ سومرو خان دی حُکمرانی دے دور نال تعلّق رکھین٘دی ہِے۔ اِیہ کہاݨی سندھی اَتے فارسی وِچ اَنج اَنج رِیتاں دے نال درج ہِے۔ لیلا ہِک قیمتی ہار ڳُم کرݨ دے جُرم وِچ اَوکھاں اَتے ݙُکّھاں دے دور تُوں لنگھ تے وَلا آپݨاں مقام اَتے حیثیّت حاصل کر گِھندی ہِے۔

سورٹھ

سورٹھ رائے دیاچ دی کہاݨی جوناگڑھ دے باشا رائے دیاچ اَتے اُون٘دی ذال اَتے ملکہ سورٹھ دی پرِیت دی کہاݨی ہِے جین٘دے وِچ سورٹھ آپݨے پئے دی پرِیت وِچ آپݨی جِند ݙے ݙین٘دی ہِے۔

سعدیہ

سعدیہ سرمد دی پرِیت دی کہاݨی باقی سَت لوک تِرِیمتاں آلی کار مہان٘دری کائے نِھیں جاں جو پُراݨے نسخیاں وِچ اِین٘دا سُراغ مِلدا ہِے۔

ست سورمیون اُتّے مصوری

مصورہ لبنی جہانگیر شاہ عبداللطیف بھٹائی دی سَت لوک راݨیاں دی مصوری (واٹر کلر) دی شکّل وِچ ڈھا چُکّی ہِن، عطیہ داؤد دی اڳواݨی وِچ اوشن آرٹ گیلری وِچ اِنّھاں تصویراں دی نمائش وِی تِھی چُکّی ہِے۔