سانحۂ پشاور

16 دسمبر 2014ء کوں تحریک طالبان پاکستان دے 7 دہشت گرد ایف سی (فرنٹیئر کور) دے لباس وچ ملبوس پشاور دے آرمی پبلک اسکول وچ پچھلی طرفوں داخل تھی گئے تے ہال وچ ونج کے اندھا دھند فائرنگ کیتی، اس دے بعد کمریاں دا رخ کیتا تے اتھاں ٻالاں کوں گولیاں ماریاں، سربراہ ادارا کوں بھاہ لگائی، 9 اساتذہ، 3 فوجی جواناں کو ملا کے کل 144 ہلاکتاں تے 113 توں زائد زخمی تھئے۔ ہلاک تھیوݨ والے 132 ٻالاں دی عمراں 9 سے 18 سال دے درمیان ہن. پاکستانی آرمی نے 950 ٻالاں تے اساتذہ کوں اسکول توں باحفاظت کڈھا۔ ہک دہشت گرد نے خود کوں دھماکے نال اݙا ݙتا جبکہ 6 مارے گئے.

ایہ پاکستانی تاریخ دا مہلک ترین دہشت گردانہ حملہ ہئی، جس نے 2007 کراچی بم دھماکے دے واقعہ کوں وی پچھوں چھوڑ ݙتا۔ مختلف خبر رساں اداریاں تے مبصرین دے مطابق، عسکریت پسنداں دی ایہ کاروائی 2004ء وچ روس وچ تھیوݨ والے بیسلان اسکول تے حملے نال ملدی جلدی ہے.

واقعے دی ذمہ داری کالعدم شدت پسند تنظیم تحریکِ طالبان پاکستان نے قبول کر گھدی۔ تنظیم دے مرکزی ترجمان محمد عمر خراسانی نے بی بی سی اردو دے نامہ نگار رفعت اللہ اورکزئی نال ڳالھ کریندے ہوئے آکھا کہ ’ساݙے چھی حملہ آور اسکول وچ داخل تھئے ہن‘۔ اوندا مزید آکھݨ ہئی کہ ایہ کارروائی شمالی وزیرستان وچ جاری فوجی آپریشن ضربِ عضب تے خیبر ایجنسی وچ جاری آپریشن خیبر ون دے جواب وچ ہے۔