ساری رات رُنّی آں

پروفیسر منور علی ملک دا سرائیکی ڳاوݨ ، جیکوں عطاء اللہ عیسیٰ خیلوی اَین٘جھا ڳایا، جو سُݨن آلاں دے دلاں وِچ ہمیشہ کَݨ امر تھی ڳیا- ڳاوݨ دے ٻول، تلے ݙِتے کھڑِن-

اقبال سوکڑی دا ݙوھڑا:

وِچ دستور زمانے دے مسکین تے ظلم روا نئیں

میݙا کوݨ ٻیٹھئے وچ دنیا دے، میݙے ہَتھ اچوں لڑ چُھڑوا نئیں

ناں رول میکوں بے درد ماہی، میں تے وَل وَل مِنَّت کرا نئیں

اقبال دے سنڳ توں نہ ٻولیں وو پر دور اکھیاں توں جا نئیں

ڳاوݨ :

ساری رات رُنّی آں میں، پَل سُکھ نئیں پایا

سَچی ݙَس وے ڈھولا، کل کیوں نئیں آیا

درداں دی ماری، اُٹھدی تے ٻاہن٘دی

ماہی دی تصویر رکھ کے سِران٘دی

لَکھ واری پچھیم، ݙَس کیوں نئیں آیا

سَچی ݙَس وے ڈھولا کل کیوں نئیں آیا

ساری رات رُنّی آں میں، پَل سُکھ نئیں پایا

سَچی ݙَس وے ڈھولا، کل کیوں نئیں آیا

سَہوں تیݙی سو واری ٻُوہا مل کے کھلی ہاں

سَؤ واری اُٹھی ہاں تے سَؤ واری وَلِّی ہاں

ٻَہوں ظلم کیتائی، چاچے دا ڄایا

سَچی ݙَس وے ڈھولا کل کیوں نئیں آیا

ساری رات رُنّی آں میں، پَل سُکھ نئیں پایا

سَچی ݙَس وے ڈھولا، کل کیوں نئیں آیا

تیکوں مِلَݨ دی کیتِم تیاری

سُرخی گوانڈھݨ تُوں منڳی ہم ادھاری

مہندی وی لائی تے کَڄلا وی پایا

سَچی ݙَس وے ڈھولا کل کیوں نئیں آیا

ساری رات رُنّی آں میں، پَل سُکھ نئیں پایا

سَچی ݙَس وے ڈھولا، کل کیوں نئیں آیا

قسماں نہ چا ہُݨ، میں کُجھ نہ آہدی

میکوں وی شک ہئی، تے دُنیا وی آہدی

ٻاہروں ہے میݙا، تے اندروں پرایا

سَچی ݙَس وے ڈھولا، کل کیوں نئیں آیا

ساری رات رُنّی آں میں، پَل سُکھ نئیں پایا

سَچی ݙَس وے ڈھولا، کل کیوں نئیں آیا

ہُݨ ول نہ وَن٘ڄیں کَلہی رَہ نہ سکدی

دُنیا دے مہݨے میں سَہہ نہ سکدی

وت کوئی نہ آکھے، اَڄ کیوں نئیں آیا

سَچی ݙَس وے ڈھولا، کل کیوں نئیں آیا

ساری رات رُنّی آں میں پَل سُکھ نئیں پایا

سَچی ݙَس وے ڈھولا، کل کیوں نئیں آیا

شاعر

پروفیسر مُنور علی ملک

ایلبم

PMC RGH

Volume 16