زیب النساء حمید اللہ

زیب النساء حمید اللہ

بیگم زیبُ النساء حمید اللہ (اردو: بیگم زیب النسا حمید اللہ) (انگریزی: Zaib-un-Nissa Hamidullah) (ڄَمَّݨ دی تَرِیخ: ٢٥ دسمبر، ١٩٢١ء – فوت تِھیوݨ دی تَرِیخ: ١٠ ستمبر ٢٠٠٠ء) پاکستان نال تعلق رکّھݨ آلی انگریزی ٻولی دی مہان٘دری مصنف زنانی، شاعرہ، صحافی، پبلشر اَتے مہان٘درے انگریزی جریدے "مرر" دی ایڈیٹر ہَن۔ اُوہ پاکستان دی پہلی زنانی ایڈیٹر ہووݨ دی پارُوں مہان٘در رکھین٘دی ہَن۔

حیاتی دا احوال

زیبُ النساء حمید اللہ ٢٥ دسمبر ١٩١٢ء کُوں کلکتہ (موجودہ بھارت دی ریاست مغربی بنگال دا دارالحکومت)، برطانوی ہند وِچ ڄَمّی ہَن۔ اِنّھاں نے اپݨی صحافتی حیاتی دا اَغاز روزنامہ ڈان تُوں کِیتا۔ اکتوبر ١٩٥١ء وِچ اُنّھاں نے کراچی دے مہان٘درے انگریزی جریدے "مرر" دا اجراء کِیتا، جیڑھا اپݨے گیٹ اَپ اَتے خبراں اَتے مضامین دی سوہݨی پیشکش دی پارُوں ٻہوں جَلتی پاکستان دا ہِک مقبول جریدہ بݨ ڳیا۔ اِیہ جریدہ اپریل ١٩٧٢ء تئیں جاری رِیہا۔ اِیں وِچالے اِیکُوں ہِک واری بندش دا وی سامھݨاں کرݨاں پِیا جاں جو بیگم زیب النساء حمید اللہ نے اِیں بندش کُوں سپریم کورٹ آف پاکستان وِچ چیلنج کر ݙِتّا۔ جِتّھاں اُنّھاں دے حق وِچ فیصلہ تِھیا اَتے اِین٘ویں "مرر" دی اشاعت وَلا بحال تِھی ڳئی۔ بیگم زیبُ النساء حمید اللہ انگریزی ٻولی دی شاعرہ وی ہَن۔ اِنّھاں دے شعری مجموعے The Indian Bouqet، The Lotus Leaves، اَتے The Flute of Memory دے ناں نال جاری تھئے۔

تصنیفاں

• Indian Bouquet - 1941
• Lotus Leaves - 1946
• Sixty Days in America- 1956
• The Young Wife - 1958
• The Flute of Memory - 1964
• Poems - 1972

وفات

بیگم زیبُ النساء حمید اللہ ١٠ ستمبر، ٢٠٠٠ء وِچ کراچی، پاکستان وِچ فوت تِھی ڳئی ہَن۔ اَتے اُتھائیں (کراچی وِچ) پُور ݙِتّی ڳئی ہَن۔