روشن ضمیر ملک دیاں یاداں

روشن ضمیر ملک پکہ گھنجیرا ،میانوالی دے ہک غریب کسان گھرانے اچ ڄمے ،انہاں اپݨی مڈھلی تعلیم اپݨے گاوں دے سکول اچوں حاصل کیتی ۔بھٹو شہید دے سیاسی نظریات تھوں متاثر تھیاں نہ رہ سڳے،اوں زمانے اچ میانوالی اچ مزدور کسان پارٹی دی قیادت اچ کسان تحریک دا زرو ہا تے کسان زمین دے مالکانہ حقوق کیتے ٻہوں متحرک ہن،علاقے دے جاگیر دار اس تحریک تھوں ٻہوں خوفزدہ تھی ڳے ہن۔میجر اسحاق محمد،دوست محمد بھچر،محمد شیر بھچر،ولی محمد انجم ،استاد عادل رشید تے ٻہوں سارے نینگر ایں تحریک دا حصہ ٻݨ کے ہراوال دستے دا کم کریندے ہویاں جاگیرداری تے اس دیاں چیرہ دستیاں کوں چیلنج کریندے رہے۔روشن ملک صحافتی محاذ دے اس تحریک دے رکھوالے ہن تے اوہ ایں سانڳے اگلے مورچے اچ ݙٹے رہے۔

بعد اچ ڄݙاں سراءیکی تحریک شروع تھءی تاے اوہ اس دا حصہ ٻݨ گءے تے استاد فدا حسین ڳاݙی صاحب دی سراءیکی لوک سانجھ اچ شامل تھی ڳءے۔انہاں میانوالی دی تاریخ اچ پہلی دفعہ منصور آفاق تے عباس شاکر نال مل کے "سراءیکی میگزین پرچول"شاءع کیتا۔تے سراءیکی مشاعراں دے انعقاد دی بنیاد رکھی۔بعد ازاں انہاں سراءیکی اخبار سچل کݙھیا۔انہان سراءیکی لوک ڳیتاں کوں اکٹھا کیتا تے انہاں دی نوک پلک سنوار کے سراءیکی رسالیاں شاءع کرݨ دا اہتمام کیتا۔

انہاں عالاقے دے مہاندرے سراءکی شاعراں دے تعارف چھاپݨ دا وی اہتمام کیتا ایں انہاں ٻہوں سارے شاعراں کوں قومی سطح تے متعارف کراوݨ اچ اپݨا حصہ پاتا۔اوہ سراءکی تحریک دی آبیاری کیتے سید نصیر شاہ نال ملے کے وی کم کریندے رہے ڳے۔ سید نصیر شاہ دا مشہور افسانہ "ککراں دے پھل "توں بعد میانوالی سراءکی ادبی تحریک دا قیادت کر یندا کھڑا ہا۔بعد ازاں پروفیسر محمد اسلم گھنجیرا،پروفیسر سلیم احسن،فیروز ںصیرالدین شاہ،پروفیسر سرور نیازی ،افضل عاجز تے منصور آفاق این تحریک اچ رنگ بھر ڈتے۔روشن ضمیر ایں قافلے دا با ضمیر راکݨ بݨ کے اپݨا حصہ پیندا رہیا۔اج روشن ملک دی یاد آندی ہے تاں پوری تاریخ سامݨے آݨ کھولندی ہے۔اوہ میانوالی دا ہک مہاندرہ انسان ہا جہڑا مظلوم طبقاں دے حقوق کیتے آخری ساہ تک لڑدا رہیا ۔۔۔۔۔۔۔۔۔۔۔۔۔۔۔۔۔جھوک فنا دی.