رقص موسیقی تے مامتا (افسانہ)
موسیقی دے باقاعدہ ابتداء پتہ نہیں کݙاں تھئی ہے۔ کرسٹوفر کارڈ ویل دے نزدیک اے پورھیاں کرݨ آلے دی چیخ اے جیڑھی اوں تھک کے تیں والا اپݨی طاقت کٹھی کرݨ کیتے ماری تے ولا کم وچ جُپ ڳیا جیڑھلے ویلھے کم کراوݨ والے کوں ایں ڳالھ دا پتہ لڳا تاں او اینکوں کم دی رفتار ودھاوݨ کیتے باقاعدہ شکل ݙے ݙتی۔ ڳالھ جیڑھلے ویلھے ٹُر پوندی ہے تاں وَل اڳوں تیں اِی ودھدی وہندی ہے۔ پہلے کنوں ٻہوں زیادہ کم گھنݨ دے نتیجے وچ پورہیت کوں جیڑھی تھکاوٹ تھئی اوندے مالک کوں فکر پئے ڳئی جو کل کیتے اینکوں کم کیتے کینویں تیار کیتا ونڄے تاں او انہیں سازیں کوں اوں وقت انہیں دی جو وی شکل ہئی۔ ہک نویں ڈھنگ نال وڄواوݨ دا سوچا۔ اونکوں اے ݙیکھ تے ٻہوں خوشی تھئی جو تھکیڑے کیوں لہاوݨ واسطے وی اِناہیں سازیں کوں استعمال کیتا ونڄ سڳدے۔ ٻس اوں ایہو کجھ کیتا جو انہیں سازیں دی لَے تے سُر کوں تھوڑا جیہاں مَٹھا کر ݙتا ۔ ایندے اِی اونکوں ایں ڳالھ دا احساس وی تھیا جو انہیں سازیں دی اُچی جِھکی تے خود اوندے کیتے وی اوہو کم کریندی اےجیڑھا کھیت تے گھر وچ مزدور نال اُ٘وں مزدوریں کیتے تاں اوندے اِچ کوئی تبدیلی نہ کیتی کیوں جو مزدوریں کوں کم کرݨ تے سمجھݨ دے علاوہ ٻیا کوئی کم نہ ہا پر اونکوں ویلھا ٻہہ کے وقت گزارݨ مشکل تھی ویندا ہا۔ فرصت اونکوں اے سوچݨ دا موقع وی ݙتے جو انہیں سازیں تے سُریں اِچ تبدیلیاں کرکے نویاں کیفیتاں وی پیدا کیتیاں ونڄ سڳدِن۔ اوں ایں ڳالھ کوں محسوس کیتا جو کم دے دوران جیڑھے ویلھے تیز لَے تے سازو ڄائے ویندن تاں نہ صرف اے جو کم دی رفتار ودھ ویندے ہے بلکہ مزدوریں دی حرکات و سکنات وچ وی ہک خاص قسم دی باقاعدی پیدا تھی ویندی ہے ایں باقاعدگی اونکوں موسیقی کنوں وی زیادہ چس ݙتی تاں اوں اونکوں گھر وچ ٻیٹھیں ہوئیں جوان تریمتیں تے وی ورتیا تاں نتیجہ اوندی توقع کنوں وی زیادہ چنگا نکھتا۔ پراے سب کجھ ہک ݙینہ دی ڳالھ ویں عمل کوں ایں موجدہ شکل تیں پُڄدیں کئی صدیاں لنگھ ڳیاں تے اَڄ ہُݨ ساکوں اے یاد وی نہیں رہ ڳیا جو جاگیردارانہ سماج دی تہذیب دا سارا انکھار کتنی خوفناک غلامی تے پورھیے نال وجود وچ آئے جیویں ذاتی ملکیت کنوں ماء دا رشتہ تے اوندی مامتا۔