رفعت عباس سئیں دا انکار آدر

رفعت عباس سئیں دا انکار آدر اتے سامراج داsoft image doctrine

سئیں رفعت عباس ہوریں نے سرائیکی قومی شناخت تے سمجھوتہ نہ کریندئیں ہوئیں ایوارڈ گھنݨ توں انکار کیتا اتے پریس وچ اے واضح طور تے آکھیا جو سرائیکی سمیت پاکستان دیاں تمام مظلوم قومیتاں کوں داپھݨ اتے سامراج دی قومیتی سنڄاݨ کوں مٹاوݨ دی مذموم کوششاں دی مذمت کریندا. رفعت سئیں دے انکار دا وسیب وچ بھرپور آدر کیتا ڳیا اتے ایں انکار کوں وسیب دا انکار آکھیا ڳیا. میں سمجھداں جو اے رفعت، عظمت اتے بلندی سئیں رفعت عباس، جہانگیرمخلص، عزیز شاہد، اشولال اتے مسعود کھدر پوش پنجابی ایوارڈ نہ گھنݨ آلے پروفیسر عامر فہیم وسبے دی قومی سنڄاݨ تے کمپرومائیز نہ کریندے ہوئیں پنجھاہ سال دی قومی جدوجہد دے تسلسل کوں قائم رکھݨ دا صلہ ھ اتے ایندے مکھ موہری سئیں رفعت عباس تاریخ وچ اپݨا ناں امر کر چھوڑے.

ڳالھ اتھاں مکدی نی اتھوں شروع تھیندی اے پنجابی سامراج اپݨی استحصالی اتے اوچھے ہتھکنڈیاں کنوں باز نی آیا. گزشتہ پنجھاہ سال جو سرائیکی زبان و ادب، شعراء، ادیب، مفکرین، دانشور، مصنفین دے ہتک اتے انہاں دے ادبی کم کوں نظرانداز کر مناسب مواقع فراہم نہ کرتے اپݨا کالا کردار ادا کریندا ریہا اتے نال نال سرائیکی زبان اتے قومی وجود دا تحقیر نال انکار کریندا ریہا. ایندے باوجود وی سرائیکی ادیباں، شاعراں، مفکراں اپݨے ذاتی وسائیل نال سرائیکی زبان و ادب دے ترویج کریندے ریہے. کروڑاں روپے دے پنجابی ادبی بورڈ دے بجٹ دے مقابلے وچ کئی گݨا کم کریندے ریہے اتے دنیا حیران رہ ڳئی جو سرائیکی ادب دا کم سندھی اتے پنجابی ادب دے مقابلے وچ کہیں سرکاری سرپرستی دے بغیر extra ordinary ھ وت سرائیکی شناخت دے ازلی دشمن نے ہک نویں خطرناک ہتھکنڈے کوں لانچ کیتا او ہائی سامراج دا soft image doctrine جو آو رل مل تے کم کروں ٹیکس اتے محصولات تساں وی ݙیندو اساں وی ݙیندوں آو اپݨا حصہ وصول کرو.

اے ڳالھ وݙے غور نال سمجھݨ آلی ھ جو جیہرھے کل تائیں اساݙا وجود تسلیم نہ کریندے ہن لفظ سرائیکی کو 1962 وچ بݨݨ آلا ہتھ ٹھوکوا تے گھڑتو لفظ تے زبان آکھدے ہن او راتی رات سرائیکی دا وجود تسلیم کرݨ پئے ڳن وجہ کیا ہائی؟ او اے ہائی "جو چھڈو یار سانجھے پنجاب دی گل کرو تسی اپݨی پنجابی بولی نوں سرائیکی دا ناں دتا اے خشی نال سرائیکی آکھو پر رل مل ما بولی دے ودھارے لئی کم کریئے" ایندے بعد پلاک PILAC اتے اوندا کردار اتے ول soft image dictrine سمجھ آ ونڄݨا چہیدا اے جو ہک خاتون کوں اڳوں کرتے پنجابی "کھورے چہرے " دے تائثر کوں زائیل کیتا ونڄے اتے وجود دی نفی نال او مطلوبہ نتائج نے نکلے جیہرے ہݨ سانجھ اتے رل مل کرݨ دے ڈھکوسلے نال حاصل کیتے ونڄن. ایوارڈ آلی سازش اتے تقریب پزیرائی جیہے عوامل ناکام تھیوݨ دے بعد FM ریڈیو دا شوشہ چھوڑیا ڳیا جیہرا جو بجا طور تے دوستاں پروفیسر رفعت عباس سئیں دی اڳواݨی وچ ناکام تھی چکئے.

ہک پاسوں تاں پلاک PILAC دے کردار دی نفی اوندے ایوارڈ تے لعنت تے ݙوجھے پاسے PILAC دے ایف ایم ریڈیو کیتے لابنگ چہ معنی دارد؟ موئی نی آکڑی پئی اے آلی ڳالھ اے. ایف ایم ریڈیو دا دائیرہ نشریات کجھ میل دے اندر تئیں ہوندے اتے اونکوں BZUدے سعائیکی شعبہ دے انڈریا اشتراک نال چلایا ویسے اے ہک ٻہوں سازش اتے سرائیکی شعبہ کیتے سوالیہ نشان ہوسے اتے سرائیکی شعبیاں اتے سرائیکی تدریسی عمل کوں under estimate کریسی. یونیورسٹیز وچ سرائیکی ادارے سرائیکی کوں علیحدہ زبان منیندے ہوئیں بݨائے ڳن اتے اے مجوزہ PILAC دا ایف ایم ریڈیو سرائیکی کوں پنجابی زبان دا لہجہ دے طور تے ݙتا ویندا پے.. مقتدر ادبی اتے سیاسی حلقے اڳوں ودھ تے ایں عمل دی مخالفت کرن اتے متعلقہ حکام کوں اپݨے خدشات لکھ تے پٹھن. رفعت عباس سئیں، راݨا محبوب اختر، پروفیسر جہانگیر مخلص، محمود مہے، سوجھل دی سنگت اتے ٻے سرائیکی اکابرین دے ایف ایم ریڈیو آلے ڈھکوسلے کوں رد کراہیں سرائیکی قومی سنڄاݨ دی جدہجہد کوں پنجھاہ سال پچھی تے سٹݨ دی سازش کوں ناکام بݨائے جیندے کیتے اساں انہاں دے مشکور ہیسے. جنوبی پنجاب صوبہ اتے سرائیکی زبان تے ہک ربط اتے تسلسل نال سیاسی، ادبی محاذاں تے سازشاں تھیندیاں پن اساکوں اشاک تھیوݨا پوسے اتے پروفیسر رفعت عباس جہیں دانشوراں دی بروقت رہنمائی اتے قومی سنڄاݨ تے کہیں وی قسم دا سمجھوتہ نہ کرݨ آلے کردار کوں لکھاں سلام. ایوارڈز، PILAC دی تقریبات پزیرائی کوں تھک مارݨ آلے عظیم سوجھواݨاں دا لکھ تھورا اتے سلام. مرشد رفعت عباس سئیں تہاݙے انکار دا وسیب تہ دلوں آدر کریندے، تہاݙی عظمت کوں شابش اتے سلام. عبیدالرحمن خواجہ صدر انٹرنیشنل سرائیکی کانگریس