رشید عثمانی

سئیں رشید عثمانی 15 اگست 1941ء کوں خیر پور ٹامیوالی اچ ریاض رحمانی بلوچ دے گھر پیدا تھئے ۔ فاضل اردو کیتا تے محکمہ لیبر اچ ملازم تھئے ۔ اکھیںدے جڳارے ، میں مٹی میں سونا، نورِ برحق ، خواب وچ دریا دریا ہے راستے میں انہاں دیاں کتاباں ہِن ۔ خیر پور ٹامیوالی اچ ایں خاندان دیاں سرائیکی واسطے ٻہوں خدمتاں ہِن ، وسیب دے سارے لوک سئیں رشید عثمانی دے ابا سئیں ریاض رحمانی دا ناں ٻہوں ادب نال چیندن ۔

رشید عثمانی سرائیکی شاعر ہے۔

اصل ناں    رشید احمد

قلمی ناں    رشید ؔعثمانی

جاہ پتہ      خیر پور ٹامیوالی ضلع بہاولپور

رشیدؔ عثمانی علمی ادبی گھرانے دے جٖموڑ ہن تے شاعری انہاں کوں ورثے وچ ملی ہے۔آپ سرائیکی دے نامور شاعر سئیں ریاضؔ رحمانی ہوراں دے فرزند ہن۔ایہا ای وجہ ہے جو انہاں دا کلام بٖہوں پختہ تے پر اثر ہے۔آپ دا نمونہ کلام ڈٖیکھو!

غزل

توں آویں تاں بدلے نقشہ میڈٖے گھر دا

رات غماں دی گزرے نظرے نور سحر دا

سنگتی اوہو جیڑھا ڈٖکھ دا سنگتی ہووے

سجٖنْ اوہو جیڑھا اوکھے وقت پکر دا

رجٖ کھاوے تاں کمّی وی سردار اَکھِیسی

بُکھا ہووے تاں سید وی بانھاں بردا

جیونْ میڈٖا بھانویں میڈٖے وس وچ کائنی

مارن والا نہ مارے تاں میں نی مردا

توں وسدا ہیںمیڈٖے دلوچ رب دی صورت

میڈٖے کیتے کعبہ ، پتھر تیڈٖے در دا

میڈٖا فن ہی میڈٖے کیتے دھن دولت ہے

میں نی بُکھا عزت ، شہرت ،مال تے زر دا

وقت رشیدؔ مسافر کر ڈٖیندا ہے سب کوں

دل وچ ہووے یا نہ ہووے شوق سفر دا

؎جَیں سوہنْے دی سک وچ اساں اپنْی عمراں گٖالی

جیوے شالا اجٖ تونْیں نس دید مہر دی بھالی

چن نے تیڈٖے متھے کولوں منگیاں ہن کجھ لاٹاں

پھُلاں نے منگی ہے تیڈٖے ہوٹھاں کولوں لالی

چن چوڈٖی دا اَہدے بنْساں متھے دا میں ٹِکا

پہلی دا چن اَہدے بنْساں تیڈٖے کن دی والی

؎جے آ سگٖیں توں بٖوہے کھلے ہن میڈٖے گھر دے

میں پہنچ نمہی سگٖدا تیڈٖے شیش محل تک

؎کہیں بٖئے دل وچ ہوون تاں دل پھَٹ ونجٖٖے

جیڑھے غم میں اپنْے دل وچ پالے ہن

٭٭٭

ڄم پل

خیر پور ٹامے آلی نال تعلق ہے

کتاباں

• میں مٹی میں سونا، شائع شدہ ١٩٧٨ء
• خواب وچ دریا
• اکھیں دے جگارے (سرائیکی نظماں)
• نور برحق (مجموعہ نعت)
• دریا ہے راستے میں

نمونہ کلام

میݙی  مٹھی   نسری بولی

جند میں تیݙے ناں توں گھولی

دیکھ تے اوندیاں بے پرواییاں

میں وی دل دی ڳالھ نہ چولی

بے قدراں دی نگری پھریم

خالی رہ ڳئی آس دی جھولی

ہیں کوں محبت آدھے ہوسن

پیڑ اے دل وچ تھولی تھولی

درد  جگیندیں  مٹھا  مٹھا

چونڈھی پیندیں پولی پولی

جن تے وینداں ٹر پوندی اے

میݙے نال غماں دی ٹولی

لفظ بدل ویندے ہن بھانویں

ہک ہوندی ہے پیار دی بولی

کیوں دنیا تے روز کھݙیوے

امن دے ناں تے خون دی ہولی

کجھ وی ہتھ نیں آیا اساں

مفت رشید حیاتی رولی

۔۔۔۔۔

کلام رشید عثمانی