دیوان خوشدل

آپ دا پورا ناں دیوان محمد غوث ثالث اتے تخلص خوشدِل ہا۔ آپ حضرت دیوان سلطان احمد قتال تے حضرت مخدوم جہانیاں جہان گشت دی اولاد وچوں ہن۔ آپ دی پیدائش ١٨٣٥ء ہے۔ آپ خواجہ فرید کنوں ݙاہ سال وݙے ہن۔ آپ اوچ شریف کنوں نقل مکانی کرتے جلال پور پیروالا تشریف گھن آئے۔ آپ حضرت محکم الدین سیرانی اویسی دے سلسلہ وچ بیعت ہن۔ جلال پور پیروالا وچ آپ دا مزار مبارک ہے۔ دیوان خوشدِل ٻہوں وݙے عالم تے درویش شخصیت دے مالک ہن، آپ کوں عربی، فارسی زباناں تے عبور حاصل ہائی۔ دیوان خوشدل ݙوہڑے دے بادشاہ ہن۔ آپ ݙوہڑے دے ݙو ترائے وݙے شاعراں وچ شمار تھیندے ہن۔ آپ دا سارا کلام عشقیہ تے فراقیہ ہے۔ آپ دے ݙوہڑے زیادہ تر صوفیانہ رنگ وچ رنگے ہوئے ہن۔ ایں توں علاوہ خوشدل کوں فراقیہ جذبات دی ادائیگی وچ کمال حاصل ہے۔

ساوݨ ماہ سوہیلا آیا، نت ملہاراں جھڑیاں

کر گھمسان وہن ندیاں رہن ہمیشہ چڑھیاں

لُڑھدے بھاݨ، نہ لہسن کندھی دن رات رہن وچ دھڑیاں

خوشدِل ماہی پار سُݨیندا میں راہ بھلیندی کھڑیاں

آپ کوں حضرت خواجہ غلام فریدؒ دے خان٘دانی استاد ہووݨ دا شرف حاصل ہے۔ آپ دا وصال ١٩٢١ء مطابق ١٣٣٩ھ وچ تھیا۔ آپ فارسی زبان وادب دے ٻہوں وݙے عالم ہن۔ ایں سانگے آپ کوں سعدی ثانی سݙیا ویندا ہائی۔