خورشید بانو

خورشید بانو جِنّھاں کوں عام طور تے صرف خورشید دے ناں نال سُن٘ڄاݨیا وین٘دا ہِے ہندوستانی سینما دی ہِک ڳائیکہ اَتے اداکارہ ہَن۔ 1948ء وِچ پاکستان ہجرت کرݨ توں پہلاں اُنّھاں دا کَم کار 1930ء اَتے 1940ء دے ݙہاکیاں اُتے مشتمل ہئی۔ اِنّھاں دی پہلی فلم لیلیٰ مجنوں (1931ء) ہئی۔ اِنّھاں نے ہندوستان وِچ تِرِیہہ توں وَدھ فلماں وِچ کَم کِیتا۔ اُوہ اپݨی فلم تان سین (1943ء) کِیتے مہان٘دری ہِن جین٘دے وِچ اِنّھاں دے مقابل اداکار کندن لال سہگل ہَن۔ اِیں فلم دے کئی ڳاݨیاں نے ٻہوں دُھم پاتی ہئی۔

ابتدائی حیاتی

خورشید بانو لاہور دے نیڑے ضلع قصور دے ہِک دِیہ وِچ ڄَمّی ہئی۔ اِین٘دا اصل ناں "ارشاد بیگم" ہئی۔ اِنّھاں دا نِکّا لاء بھاٹی ٻُوہے دے علاقے وِچ علامہ اقبال دے ٹَٻَّر دے نیڑے گُذریا ہئی۔

کَم کار

عالم آرا ہندوستان دی پہلی بااواز فلم، جیڑھی 14 مارچ، 1931ء کوں ممبئی دے میجسٹک تھیٹر وِچ پیش کیتی ڳئی۔ اِیں سال ای خورشید بانو دی پہلی فلم لیلیٰ مجنوں (1931ء) جاری تھئی۔ این٘دے بعد اِنّھاں دیاں فلماں "مفلس عاشق (1932ء)، نقلی ڈاکٹر (1933ء)، بم شیل اَتے مرزا صاحباں (1935ء)، کمیاگر (1936ء)، ایمان فروش (1937ء)، مدھر ملن (1938ء) اَتے ستارہ (1939ء)" ہَن۔

1931ء توں 1942ء دے وِچالے انّھاں نے کلکتہ اتے لاہور دے سٹوڈیواں دیاں بݨائیاں ہوئیاں فلماں وِچ کَم کِیتا اُوہ ڳائیکہ - اداکارہ دے طور تے پِچھاݨی وین٘دی ہَن۔ ٻِیا اُوں ویلے دیاں اِنّھاں دیاں فلماں ݙیکھݨ آلیاں اُتے کوئی خاص اثر ناں چھوڑ سڳیاں۔ اِنّھاں دے عروج دا ویلا اُوں ویلے آیا جِہڑیلے اُوہ "رنجیت مووی ٹون فلماں" وِچ کندن لال سہگل اَتے موتی لال دے سامھݨے کَم کِیتے بمبئی کوچ کر ڳئی۔

کندن لال سہگل دے نال چتوربھوج دوشی دی فلم "جگت سورداس" اَتے این٘دے بعد "تان سین" وِچ کَم کرݨ دے بعد اُوہ اپݨے عروج تئیں پُڄّی۔ انّھاں کوں "پہلی ڳائیک ستاریاں دی جوڑی" دے طور تے وی سُن٘ڄاݨا وین٘دا ہئی۔

پاکستان آمد

پاکستان کوچ کر تے آوݨ توں پہلاں اِنّھاں دی ہندوستان وِچ اَخِیرلی فلم "پپیہا رے (1948ء)" ہئی جیڑھی ہِک زبردست ہٹ تھئی ہوئی فلم ہئی۔ 1948ء وِچ اُوہ اپݨے پئے دے نال پاکستان آ ڳئی اَتے کراچی، سندھ وِچ ٹِکاݨاں کِیتا۔

اِنّھاں نے 1956ء وِچ ݙُو فلماں "فنکار" اَتے "منڈی" وِچ کَم کِیتا۔ "منڈی" خورشید بانو دی اَواز اَتے میوزک کمپوزر رفیق غزنوی دی پارُوں قابلِ ذکر ہئی جاں جو فلم دی ناقص ہینڈلنگ دے پاروں توں فلم باکس آفس اُتے کامیاب ناں تِھی سڳّی۔ ٻئی فلم فنکار سینٹ پال انگلش ہائی سکول، کراچی وِچ طبیعیات دے اُستاد رابرٹ ملک دی تیّار کِیتی ہوئی ہئی جاں جو اِین٘دا انجام وی پہلی فلم آلی کار تِھیا۔

وفات

خورشید بانو 18 اپریل 2001ء کوں اپݨی 87 ویں سالگرہ دے چار ݙیہاڑیاں بعد پاکستان دے شہر کراچی وِچ فوت تِھی ڳئی۔

ٻاہرلے جوڑ

• انٹرنیٹ مووی ڈیٹابیس (IMDb) پر Khurshid Begum
• Rare Picture of Khursheed Bano