حفیظ آکاش نتھوانی

حفیظ آکاش نتھوانی سرائیکی شاعر ہے۔ دیرہ غازی خاں وچ راہندے

نمونہ کلام

ݙوہڑہ

اساں چھج بدھڑیں جو لوک ہسے ساکوں آکھے کوئی چھج بدھ ڈیندوں

اساں تیلی تیلی بدھ ڈیندوں بھن تروڑ دا بھج بھج بدھ ڈیندوں

جیندے سر تے کوئی کج ہے کینا بے کج سر تے کج بدھ ڈیندوں

آکاش جے کہیں کوں شک ہووے ساکوں آکھے اج اج بدھ ڈیندوں

حفیظ آکاش نتھوانی

ڈوہڑہ

پچھ حال نہ ساڈی زندگی دے اساں اپنڑے حال اچ ٹھیک ہسے

کیوں آکھوں مونجھے رہندے ہیں ودے مونجھ ملال اچ ٹھیک ہسے

رکھے مونجھا یا خوشحال رکھے اساں سئیں ہر حال اچ ٹھیک ہسے

آکاش او مال نکھیڑے ناں ودے اوندے مال اچ ٹھیک ہسے

حفیظ آکاش نتھوانی

ڈوہڑہ

میڈا مالک ایہا منت لا ساڈے حال بے حال ہن مافی ڈے

کئی لال موئے ہن ماواں دے کئ مر گئے بال ہن مافی ڈے

کئی لوک بیمار ان گھر دے وچ کئی تھئے نڈھال ہن مافی ڈے

آکاش کوئی رحمت بھیج ساڈو تیڈے کرم کمال ہن مافی ڈے

حفیظ آکاش نتھوانی

ڈوہڑہ

ہے کہر کرونا ہووے پئ کیا اہدے کہر میں ویندی ہاں

گھر بیٹھئیں بیٹھئیں تھک پئ آں اوندا کرنڑ دیدار میں ویندی ہاں

میں تاک تےکھڑ کھڑ ول آئ آں نئیں آیا یار میں ویندی ہاں

آکاش او آپ تاں نئیں آیا گھرو نکل کے باہر میں ویندی ہاں

حفیظ آکاش نتھوانی

ڈوہڑہ

اساں بادھے لوک مشہور ہسے ہر چیز کوں وونڑ وونڑ بدھ ڈیندوں

ہر چیز دا اپنڑا گنڑ ہوندے ہر چیز دا گنڑ گنڑ بدھ ڈیندوں

اساں کوڑے نگ تاں نئیں بدھدے نگ چونڑویں چنڑ چنڑ بدھ ڈیندوں

آکاش جڈاں تئیں کیا تھیسی توں کھڑ تھی ہنڑ ہنڑ بدھ ڈیندوں

حفیظ آکاش نتھوانی

غزل

دوستیں دی محبت سانگے

سجنڑ ول آ توں ہنڑ ساڈو پیاں آندیاں بہاراں ہن

تیڈے بھالے نہیں مکدے ساڈیاں پل پل پکاراں ہن

کلھیپے کوں کروں کیڈے تیڈا دیدار نئیں ملدا

اساں قیدی کلھپ دے ہیں کلھیپے دیاں دیواراں ہن

ہزاراں خاب ڈہدے ہیں ہزاراں سوچاں آندیاں ہن

اتھاں مونجھیں دیاں کونجاں ہن تے کونجیں دیاں قطاراں ہن

رسنڑ تیڈے دا سی ہوندے کنڈیراں ہن جرینڑاں ہن

بدن ساڈے تے ہنڑ تونڑیں امیدیں دیاں لکاراں ہن

توں اج اوسیں یا کل اوسیں اے دل کوں لارے لیندے ہیں

تیڈے بھالے بھلے لگدن پیا نبھدیاں ڈیہنواراں ہن

اساں آکاش تیڈے ہیں تیڈے رہسوں حشر تونڑیں

ایہے وعدے ہمیشہ ہن ایہے ساڈیاں گزاراں ہن

میڈے چندر کوں قاصد وینج آکھیں ہر گال منیدا کیوں رسدے

او جو کجھ منگدے میں کولوں اوکوں سب کجھ ڈیندا کیوں رسدے

جیری گال دی اوکوں سمجھ نئیں آئ اوہا میں سمجھیندا کیوں رسدے

آکاش جے میڈی غلطی ہے اوندے پیر نپیندا کیوں رسدے

(((((حفیظ آکاش نتھوانی)))))