حبیب فائق

اصل ناں    حبیب اللہ

قلمی ناں    حبیب فائقؔ

جٖمنْ        1934ء

وفات      2001ء

حبیب فائق ملتان دے ہک عالم فاضل گھراݨے دے فردہن۔ آپ دے ݙاݙا محمد بخش فائق ہک صدی پہلے شہر آشوب لکھ تے سرائیکی شاعری دی ٻکل وچ لال جواہر پاتے۔ حبیب فائق ایں دور وچ جدید نظم دے حوالے نال سرائیکی ادب کوں سنگریندا پے۔ حبیب فائق دی نظم سوچ دیاں ݙونڳیاں سوکھڑیاں ݙیندی اے۔ او اپݨے عہد دے مسائل تے جبر دے خلاف انسانی کوشش کوں اپݨی شاعری دا موضوع بݨیندن۔ انھاں دی زبان خالص ‘ علامتاں اوکھیاں پر نویاں تے خیالات ٻہوں بلند ہن۔ انھاں دی نظم تمام جدید شعراء وچ انج پرکھی ویندی اے۔

چپ وساکھ

ساݙی سوچ دیاں ڄڑاں پاݨی

لال لئیاں تے لائیں

وچ سیپ دے راہندن

سنیاں اکھیں بھال بھلیندیں

ہوٹاں اُتوں چپ الیندیں

ٻور چُڑیندیں

انڳلیں سنیاں راہندن

واہندے پاݨی دریاواں دے

سنیاں اکھیں ہوٹھ تے انڳلیں

پوڑی راہندن

سوہݨے سائیاں

ساکوں اپݨی تریہہ لہاوݨ کیتے

وچ سیپ دے راہوݨ ݙیویں

لال تسیاں تے لاݨے

ساݙے تول وہاݨے

افسانوی مجموعہ’’چیڑھیاں گٖنڈھیں‘‘دے خالق حبیب فائقؔ دا شمار ملتان دے وڈٖے وڈٖے لکھاریاں وچ تھیندے۔اوہ ہک سادہ مزاج ، خاموش طبع ، فرشتہ صفت انسان ہا۔ادب دیاں تمام صنفاں اوندی دسترس اچ ہن۔خاص طور تے جدید تے مختصر نظم دے حوالے نال آپ دا بٖہوں وڈٖا ناں ہے۔شاعری ہووے تے بھانویں نثر۔آپ مدعا ذرامشکل مفہوم اچ پیش کریندے ہن۔

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان

غزل دے شعر

؎توں بٖیٹھا ہتھ ملیندا ہیںپتھراں وانگے

تیڈٖا وجود ہے شیشے دے اکھراں وانگے

نظر دی کھیڈٖ ہے یا ول کوئی تماشہ ہے

شمع خیال دی بٖلدی ہے سوجھلیاں وانگے

٭٭٭