حاصل مصدر

مصدر کہیں کم دے کرݨ، ہووݨ، یا سہوݨ کوں ظاہر کریندے اتے او اسم جہڑا مصدر دی حالت کوں ظاہر کرے، اوں کوں حاصل مصدر آہدے ہن۔ ݙوجھے لفظاں وچ حاصل مصدر، مصدر دی کیفیت یا حالت کوں ظاہر کرݨ آلا اسم ہے۔ سرائیکی وچ ہک مصدر دے کئی کئی معنے ہوندن۔ ہر معنے دے مطابق مصدر دی کیفیت کوں ظاہر کرݨ کیتے حاصل مصدر وی اَن٘جو ان٘ج ہن۔ بعضے ویلے ہک مصدر کنوں پنج، چھی یا ست یا ایں کنوں ودھ حاصل مصدر وی بݨدن۔ کجھ مصدر ، انہاں دے معنی تے حاصل مصدر ایہ ہن:

کجھ حاصل مصدر

مصدر	اردو مطلب	حاصل مصدر
آوݨ	آنا	آ، آمد، آئی، آندا، آن٘وݨی، آمدݨ
اَڑݨ	اڑنا	اَڑ، اَڑا، اَڑاپ، اَڑان٘د، اَڑی، اڑان٘گا
بݨݨ	بننا	بݨ، بݨاوٹ، بݨائی، بݨت، بݨاء
بھرَݨ	بھرنا	بھر، بھرت، بھرا، بھرائی، بھار، بھرݨاں، بھری

سرائیکی زبان دے حاصل مصدر جہڑے مصدر دی حالت کوں ظاہر کریندے ہن۔ مصدراں دی ڳنتری کنوں کئی گنا ودھ ہن۔ ہک مصدر دے کئی کئی حاصل مصدر ہووݨ، زبان دی امیری، مصدر دے کئی کئی ورتاوے تے ان٘ج ان٘ج مفہوم کوں نشابر کریندے ہن۔ ہر مصدر جہڑے ویلے آپݨا استعمال بدلیندے تاں اُوندا حاصل مصدر وی نال نال بدل ویندے۔ ایہ ڳالھ سرائیکی زبان دے وݙپ تے وکھرپ کوں ظاہر کریندی ہے۔ [[ونکی:سرائیکی زبان تے ادب]]