جمیل بلوچ

جمیل بلوچ تحصیل تونسہ شریف دی ہک پرانڑی وستی ہیرو پچادھی دے راہنڑ آلا ھے ایں جوان کوں اے اعزاز حاصل ھے کہ ایں بندے فیس بک تیں آپڑیں مٹھی ماء بولی ءچ سینکڑیں دی تعداد ءچ نثر لکھی ھے سب توں پہلے فیس بک تیں سرائیکی لکھنڑ آلا سرائیکی وسیب دے ڈکھ درد سرائیکی وسیب دا ہر رنگ، ونگ وانڑیں توں گھن کے سرداریں دے جبر و ستم تک، دامان دی کریھ تھل دی ریت روھی دی تس، ہر رنگ کوں سرائیکی دے رنگ ءچ لکھنڑ آلا سرائیکی لکھاری اے. ایندی لکھت دا ہک نمونہ اے ہے:

"میڈی وستی دا پہلوان ھا جئیندے کٹھے کوئ پہلوان کشتی کرنڑ تیں راضی نہ تھیندا، جیکوں آھدے ہاسے اُو اوندا ناں سُنڑ کے بھج ویندا ھا، ساڈا، پہلوان کہیں ویلھے اکھاڑے دی ہک چُنڈ تیں ونج ڈنڈ مارے کہیں ویلھے بی ُچنڈ تیں ونج کے ٹپوسڑیاں ماریے وت وی کوئ پہلوان اوندے نال پنگا نہ پئیندا، تساں اے نہ سوچو جو ساڈا پہلوان کوئ الطاف ڈاھی ھا یا بشیر بھولا بھالا ھا، بلکہ ساڈے پہلوان کوں اے خدا دا قہر ھا اُو منیندا نہ ھا بھانویں جو ہینڑاں تھیندا ھا کنڈ اتوں تیں چاء پوندا ھا مار گھتو تاں ھاؤ ڈاڈھے نتاں پہلوان ایں گال تیں بضد راھندا ھا حالی کنڈ نیں لگی اساں وی اُوں پہلوان وانگوں کنڈ اُتو تیں چئ پئے ہیں جتناں ساکوں سُجائے نے، مونھ متھا ہکو جھئیاں کر سٹیے نے مجال ھے ساکوں اغرا وی آیا ھووے.

پیپلز پارٹی جئیں ساڈی مٹھی بولی کوں تسلیم ہی نیں کیتا اساں انھیں دے بھٹو دی لاش گل ءچ پاء کے ٹپوسڑیاں مریندے ودے ھئیں جو حالی بھٹو زندہ ھے، یعنی کنڈ اُتو تیں چائ پئے ہیں، مسلم لیگ نون، وسیب دی ازلی دشمن سارے جانڑدے ہیں وت وی شیر تیں مُھر لئیندے ہیں جو ساڈا گودا جن، اوں، پارٹی دا ھے وڈی دلیل اے ھے ساڈے وسیب دا ھے بندہ پُچھے ایں لکڑ بھگڑ گودے کڈاھیں وسیب دے بارے تخت لاھور دے رھزنیں کوں گال کیتی ھے جواب زیرو،گودا ساڈی بدبختی واسطے جایا اتھائیں ھا باقی راھندا اسلام آباد یا لاھور ھے وت وی مقامی منیندے ھئیں، یعنی کنڈ اتو تیں چائ پئے ہیں، گودا ہر الیکشن تیں آپڑاں مفاد ڈیکھ کے پارٹی وٹا چھوڑیندے ساکوں سمجھ نیں آئ جو اے لالچی مطلب پرست تیں خود غرض ھے اے ساڈے حلقے دا وسیب دا کیا بھلا کریسی ہر دفعہ پارٹی بدلنڑ آلے دی اگو کیا عزت ھوسی کائینا اے ساریاں گالھیں ساڈے موٹے عقل ءچ کتھاں آندن، جیرھے گودے جیرھے پگڑ پوش جیرھے پیر اتناں وی نیں کیتا جو پیونڑ دا پانڑی کوئ ہسپتال، کوئ سکول کوئ روڈ نہ بلکل کائینا بس اساں کنڈ اتو تیں چائ پئے ہیں، ہک دفعہ ولا انھیں کوں ووٹ ڈے کے اساں اوں پہلوان دی روح کوں سکون پہنچا سگدے ہیں آؤ سارے رل کے نعرہ ماروں اساں ھریے کاٰئینسے کیوں جو حالی اساں، کنڈ اُتو تیں چائ پئے ہیں. "