تاج محمد گوپانگ نال نشست

لفظیں دی جادوگری نال دِل موہ گِھنݨ والی شخصیت، کمالِ آذَری نال حرفیں کوں صورت ݙیونڑ والی مہان ہستی تے ہمیش مزاحمت اور انقلاب دا درس ݙیونڑ والے عظیم انسان صوفی تاج گوپانگ سئیں دے نال فاضل پور دی سب توں معتبر جاہ استاد نذیر فیض مگی دی بنچ تے سردار منظور احمد خان دریشک تے سعید خان پٹھان دے نال سوجھل نشست..

صوفی تاج محمد گوپانگ سرپرستِ اعلٰی سوجھل دھرتی واس ہِن.. سابق صدر سرائیکی لوک سانجھ تے سابق چیئرمین سرائیکی تھنکرز فورم ہِن. ہُنیں دی ساری زندگی مجاہدے وچ گزری اء.. صدیئیں دا سچ الیندے گزری اے، زندگی جیون دے رمز ݙسیندا اے بزرگ آپنڑیں ساری زندگی آپنڑیں مقصد تے وار چُکیے اور ہݨ وی آپنڑیں زندگی دے دان کوں نَویں نسل دے مستقبل دا سوبھ بنڑدا ݙیکھݨ چاہندے..

زبان کھسیج پئی اے تاں کِیا تھیا، چُپ نِسی کیتی، مزاحمت کار جو ہا، اُنگلیئں دے ݙوݙیں کوں اَواز ݙے ݙِتی ہِس.. ہوندی دھاڑ، ہوندی پُکار اڄ حرفیں تے لوظیں دا چولا پا وِچ بزار دھمالاں پیندی کھڑی اے..

32 سال توں ہر سال تھیوݨ والا عاشق بزدار دا سرائیکی میلہ ہِیں دفعہ صوفی تاج دی خدمات دے اعتراف اِچ ہُنیں دی دستار بندی دا منظر ݙیکھسی.. (ہک لائن دے وچ ݙوں مہان ہستیں دا ذکر کیتم میݙے لفظیں دا سِر وی فخر نال اُچا تھیوݨ پئے ڳئے) عاشق بزدار سیئں نے ہمیشہ ہِیں دھرتی دی سوجھواݨ ہستیئں کوں خِراج تحسین پیش کِیتے، اَکھیں ہِیں منظر کوں ݙیکھنڑ کیتے اُباہلیاں ہِن.

جڈاں وی میں کہیں نال ناراض یا غصے ہوواں صوفی تاج سئیں دا ہک فقرہ میکوں ہوش اچ گِھن امدے.. او آہدن "میݙے نال اج تک جیہڑی وی زیادتی تھئی اے تے اج توں بعد وی جیہڑا ظلم وی تھیسی میں سب دا سب، معاف کِیتم" صوفی جو ہے.

عثمان کریم بھٹہ