بزم کیفی ڄام پور

بزم کیفی جام پور مہا محقق ،ادیب تے شاعر حضرت کیفی جام پوری دے نام_ نامی دی نسبت نال قائم کیتی گئی ادبی ثقافتی تنظیم ھے جئیں مسقتل مزاجی نال آپڑاں پندھ جاری رکھیا ہویا ھے۔ اے ضلع راجن پور دی واحد تنظیم ھے جیندا پندھراں ڈیہنواری اجلاس باقاعدگی نال منعقد تھیندے ۔ ایں کنوں علاوہ شعراء نال شاماں مناونڑ کتابیں دی رونمائی ، ادبی ثقافتی سماجی حوالے نال خدمات سر انجام ڈیونڑ والی شخصیات دے آدر اچ تقریبات منعقد کیتیاں ویندن ۔ ماشااللہ بزم کیفی اشاعتی ادارے دے طور تے وی آپڑی خاص سنجانڑ رکھیندی ھے ہنڑ تک سولھاں صفحاتی ڈھگ کتابچیں دے نال نال بزم دے صدر حبیب اللہ طارق دیاں کتاباں پیریں پراگڑے پیار دے ۔ پلکیں ہیٹھ ستارا چھپ چکن ۔ ایں ویلھے وی حبیب اللہ طارق تے سلیم انسب دیاں ڈو کتاباں پریس اچ موجود ان تے کجھ ڈینہہ تک تہاڈے ہتھیں ہوسن ۔ محرالحرام اچ محفل سلام و منقبت، ربیع الاول اچ نعتیہ مشاعرہ ۔ عیدین دے موقعے تے شام_سخن ، یکم اپریل کوں حضرت کیفی جام پوری دی سالگرہ اکتوبر اچ انہاں دی برسی اتے اکویہہ فروری کوں ماء بولی دا عالمی ڈینہہ بزم کیفی دے سالانہ پروگرام ہن ۔ گزریل کلھ وی اے ڈیہنوار حسب سابق پورے جوش و خروش نال منایا گئے ۔ جیندی صدارت بزم دے صدر حبیب اللہ طارق کیتی ۔ کارروائی دا باقاعدہ منڈھ تلاوت قرآن مجید نال بدھا گئے تلاوت دی سعادت فیاض شاد بھٹی (نائبصدر ) دے حصے اچ ائی۔ پہلی نشست اچ ماء بولی دے ڈینہہ دے حوالے نال کلیم اللہ بھٹی لیڈر ، ملک ریاض حیدر، ملک اسحاق علیم ، آفتاب نواز مستوئی تے سلیم انسب آپڑے خیالات دا اظہار کیتا ڈوجھی نشست اچ شعراء کرام حبیب اللہ طارق، ملک اسحاق علیم، سلیم انسب، فیاض شاد، ناصر ڈینہ، جمیل احسن بھٹی، ندیم نصرت، شعیب زمان، جنید قریشی ، غلام عباس ہکدل، نصر اللہ جامی، اکرم لنجوانی، رمضان رمضی، رمضان راوی، تے سیف اللہ آتش، آپڑاں کلام سنڑا تے داد حاصل کیتی جڈانجو گلوکار کاشف اقبال کاشی، طالب حسین بھٹی گیت پیش کیتے معززین علاقے دی کثیر تعداد شریک محفل ہئی ۔جنہاں وچ محمد اختر نسیمی، رؤف بالم، ریحان خان، صابر حسین ، محمد یوسف ببر، شاھد حسین بابا، دے ناں شامل ہن ۔ ایں موقعے تے منڈھلی تعلیم مادری زبان اچ ڈیونڑ، سرائیکی صوبے دے قیام سرائیکی اساتذہ دی بھرتی سمیت بیاں قرارداداں وی منظور کیتیاں گیاں ۔ چیھکڑ تیں محمد اختر نسیمی وسیب اچ امن تے بابا راز تاجدار دے درجات دی بلندی دی خصوصی دعا کرائی۔ ایویں اے شاندار تقریب رات دے بارھاں وجے تئیں جاری رہ گئی. (سلیم انسب)