اگوھاں پاندھی

اگوھاں پاندھی

اگوھاں پاندھی ۔

سرائیکی دھرتی ادبی حوالے نال بہوں زرخیز اے  ۔ عجب رنگ برنگے پھل اپنی خشبو کھنڈاون ءچ مصروف ءن ۔ پھل توں پھل تئیں دا سفرکرن آلے شاعریں دی ہک انڑکھٹ تندیر اے ۔ جہڑی کہ دھیرے دھیرے اڈراک تھیندے آندن تے آپنڑی ہوند نشابر کرن سانگے کتاباں چھپوان دی کوشس کریندے پئین ۔  ویسے اج دے دور ءچ کتاب چھپاون کہیں فرہاد دی نہر کھٹن کنوں گھٹ کائنی ۔

سندھ دریا دی لموچڑ پٹی  مولوی لطف علی دی بھاگوند وسوں دا واسی قاصر فریدی سرکار دا عقیدت مند نفیس لب ولہجے دا مالک انتہائی زہین نوجوان  دھرتی تے قوم دی فکر رکھن دے نال نال فکر آخرت رکھن آلا شاعر  سئیں  فرہاد فریدی  جیندے لقب فریدی کنوں فرید پاک دی محبت دی جھلک واضح نظردی اے

میڈی بہوں تھوڑے عرصے دی شناسائی اے  ہکا پہلی ملاقات ءچ جوان دل موھ گھدا ۔ نعت منقبت  رباعی قطعہ ۔ غزل  ہر صنف دے وچ طبع ازمائی کرن آلا اے نوجوان جئیں ویلھے علم عروض بحر تے گالھ مہاڑ شروع کرے تاں حیران تے لاجواب کر بلہیندے  فرہاد دی شاعری زیادہ عشق خدا او عشق رسول آلے پاسے توجہ ڈیویندی اے  فکر آخرت  حساب حشر دا آلے پاسے گھن ویندی اے جہڑی کہ ہر مسلمان واسطے ضروری اے۔

فن دےحوالےنال فرہاد  واقعی فن دا فرہاد اے  اے اپنڑے لفظیں نال اپنڑی سوچ دے تیشے نال پہاڑیں دے ھاں ءچوں رستے کڈھن جانڑدے   اے موئی تہزیب دا ماتم نئیں کریندا اے کہیں خان دی دی ثناء نی لکھدا اے نندروک خیالیں وچ شعر نئیں آہدا بلکہ رجے کجے وجدان نال  جاگدی فکر نال شعر لکھدے اور شعر کوں اوں رنگ ءچ لکھدے جہڑا رنگ حقیقی معنی جچدا ہووے

فرہاد ٻہوں تھوڑے عرصے وچ شاعری دے تمام صنفیں دا بالخصوص روحانی شاعری دا ڈھیر سارا پندھ کرݨ اچ کامیابی حاصل کیتی اے۔ ہک ذہین شاعر ہمیشہ اپݨی بلند خیالی دے نال اڳوہاں پیر رکھیندے ہوئیں موضوعات دے نال نال ٹُردے اتے جاہ جاہ تے اپݨے ہووݨ دا احساس ڈیویندے۔ فرہاد نے وی اپݨی شاعری دا پورہیا وسیب کوں دان کر تے نویں سوچاں دے در کھول چھوڑن۔ میکوں پورا یقین اے جو وسیب دا قاری، فرہاد فریدی دی فکر تے اسلوب توں ڈھیر سارا استفادہ کریسے اتے ایں فکر کوں اڳوں تے ودھاوݨ دا باعث بنڑسے .

ظفرچانڈیہ ۔

نظام آباد  رحیم یار خان۔

1march 2024