انجم لاشاری
اصل ناں رفعت انجم
قلمی ناں انجمؔ لاشاری
جٖمنْ 1951ء
انجمؔ لاشاری مرحوم سرائیکی دے معروف بزرگ شاعر سئیں سفیرؔ لاشاری دے صاحب زادے ہن۔سرائیکی شاعری دے میدان اچ انہاں اپنْے آپ کوں تھوڑے ای عرصے اچ منوا گھدا ہا۔انجم تاں سرائیکی ادب دے اسماں توں ترٹ کے غائب تھی گٖئے ۔پر اوہ شعری تے نثری ادب دے حوالے نال زندہ ہے تے زندہ رہسی۔آپ دی غزل دا نمونہ ڈٖیکھو!
غزل
[لکھو | ماخذ وچ تبدیلی کرو]سوچ سکھنْی سنجٖی آس آتی لگٖے
اے حیاتی بھلا کیا حیاتی لگٖے
ُروح گھارے کوں اکھ روونْ ایجھی لگٖے
تن دی روہی یکی بے براتی لگٖے
شام شیشے تے یاداں دے اولوں لہن
سانجھ سانگے سنویں سنج سکاتی لگٖے
چندر چاندی کلہیپے دا گٖاہنْاں بنْے
ساہ سینے کوں سونے دی کاتی لگٖے
کل بٖکر وال ٹوبھے تے ایں کر پئے
بٖال رڑ کے جیویں ماء دی چھاتی لگٖے
؎گٖلیاں دے ککھ چُنْ چُنْ اپنْیاں اکھیاں تے رکھ چمداں
شاید ہوون میں وانگوں اسمانوں ڈٹھے تارے
انجمؔ ہر محفل وچ تیڈٖے ناں دا ذکر تھیندے
تیڈٖی صورت کیکوں بھلدی تیکوں کون وسارے
٭٭٭
سرائیکی دا انجم۔ انجـم لا شـاری
[لکھو | ماخذ وچ تبدیلی کرو]لکھت: کرن لاشاری
صدر سرائیکی عوامی تریمت تحریک پاکستان
بھا چاوݨ آئی چلھ توں بݨ ٻیٹھی گھر دی سئیݨ،،
ابھے سر دی ݙیݨ، میݙے گھر دیاں خوشیاں کھا ڳئی،،
(انجم لاشاری)
یادش بخیر میں کہیں جاہ پڑھیا ھا جو احمد پورشرقیہ سرائیکی ادب دا لکھنئو ھے برحال اساکوں لکھنئو نال مطلب کینھی،
پر اے حقیقت ھے جو احمدپورشرقیہ دی دھرتی ہمیشہ سرائیکی ادب سانگے زرخیز ثابت رہی ھے، اتے اتھاں سرائیکی ادب دے کئی نامور درخشاں ستاریاں دا خمیر ھے،
اتے جیندے وچو ھک روشن ناں سئیں انجمؔ لاشاری سئیں ھن.
سئیں انجم لاشاری صاحب دا اصل ناں سجاد الحسن خان لاشاری ھا تے جناب عظیم سرائیکی انقلابی شاعر سئیں سفیر لاشاری دے وݙے پتر ھن،،
سئیں انجم صہیب 1956 دے وچ احمدپورشرقیہ دے نیڑے وستی مہراب والا وچ پیدا تھئے تے ابتدائی تعلیم تو گریجویشن تئیں احمدپورشرقیہ تے بہاولپور وچ حاصل کیتی.لفظیں دی جڑت دا سوبھ تے تخیل دا الہام گھر دی وراثت ھا تے شاعری دا آغاز ٻلپݨ توں ہی شروع کرݙتا، جناب سئیں اردو تے سرائیکی دے بہترین شاعر ھن تے خاص سرائیکی شاعری وچ انھاں دا اّچا ناں ھے،،
زندگی دے گزروہاݨی کریندے اسی (80) دے ݙھاکے وچ کراچی آ ڳے اتے صحافت نال وابستہ تھی گے ایں دوران نواے وقت، تے جنگ اخبار جیے اداریاں وچ کافی اہم عہدیاں تے کم کیتا تے نال نال اردو کالج کراچی تو ایم اے صحافت دی ڈگری حاصل کیتی،،
پر قدرت کوں کجھ ٻیا منظور ھا تے سئیں کو ݙو (2)رمضان 1997 کو اچانک سر وچ درد پیا، جنھیں کو ایمرجنسی وچ ہسپتال ٻڄایا ڳیا، پر او تئیں رب سوہݨے اپݨے پیارے کو واپسی دا سݙ مار چکے ھن، تے سرائیکی زبان دے اے روشن ستارے محض چالھی (39)سال دی عمر وچ ماء ٻولی سرائیکی کوں لازوال تخیل ݙے تے ایں جہان فانی تو جھوک لݙا گئے،،
اڄ وی سئیں انجم لاشاری صاحب اپݨے کلام دی صورت وچ اساݙے درمیان موجود ھن تے راہسن،،
آخر وچ سئیں دے کلام دا ھک بہترین نمونہ،، جیندے وچ اپݨی روہی نال محبت دا اظہار کریندے پن
روہی چولستان تے شالا کرم کرے کلتار،
بونداں ساوݨی جل تھل تھیوے چودھار،
نند نہ ماون کھیرڑے ہرپاسو موج بہار،
کنڈا ڄال کرینھ کھپ لئی لاݨا کرے سنگار،
روہی بݨے کنوار ݙہینھ ماݨے بھاگ سہاڳ دے