اعجاز ڈیروی

اصل ناں    محمد اعجاز

قلمی ناں    اعجازؔ ڈیروی

جٖمنْ        1938ء

جاہ پتہ      ڈیرہ غازیخاں

اعجاز ڈیروی اردو تے سرائیکی دے مہاندرے شاعر ہن۔ انہاندی غزل اچ عجز و نیاز تے سوز و گداز پاتا ویندے۔

اصل ناں محمد اعجاز قلمی ناں اعجاز ڈیروی تے ابے سئیں دا ناں ملک نور احمد ہے۔ اُترا برادری نال تعلق رکھدن۔13جون 1938ء کوں ڈیرہ غازی خان اچ پیدا تھئے۔ بی اے توݨیں تعلیم حاصل کرݨ دے بعد بطور ٹیچر فرائض سرانجام ݙتے۔ سئیں شفقت کاظمی (مرحوم) دی شاگردی اچ 1961ء کوں شاعری دا آغاز کیتا۔ تصانیف اچ اکھاݨ ، تاب ِ سخن، زخم آرزو، کلیہپا تے ٻیاں کتاباں شامل ہن۔ ڈیرہ غازی خان اچ رہائش پذیر ہن۔ سرائیکی دے ہر کٹھ میل اچ بھرپور شرکت کریندن۔

نمونہ کلام

؎ ہاں ازلاں توں پیاسہ ذرا ہولے ہولے

نظر نال ساقی پلا ہولے ہولے

ایں حبٖس اچ تاں ساہ دا وی ساہ پیا نکلدے

کوئی برگ مولا! ہلا ہولے ہولے

؎ہنْ تاں سنْ التجا فقیریں دی

جھوک آکے وسا فقیریں دی

اپنْے در توں اٹھا نہ جھنْکیں نال

یاد آسیا ولا فقیریں دی

٭٭٭