اصغر چھینہ

اصغر چھینہ سرائیکی شاعر ہے

ڄم پل

وڳ صدر بکھر وچ ڄمے۔ لٹن وچ راہندے۔

ایم اے اردو

بی ایس سی کمپیوٹر سائنس

سکول وچ استاد ہن۔

ساݙے یار تاں یار وی یار ہن پئے جݙاں ساݙے بخت کمال ہن چنگے حال ہن

ساݙے من اچ خشیاں خشیاں ہن کل سنگتی ساݙے نال ہن بہوں لجپال ہن

ساݙا پیار پریت عروج تے ہا دل رکھدے راز دی گال ہن او بھائیوال ہن

ڈھلے بخت تاں اصغر چھوڑ گئے جیڑے رکھدے خاص خیال ہن بخت جو نال ہن

تیݙی منت کریندیاں چن دلبر نہ چھوڑ کے ونج میݙا ہک توں ہیں

جیڑے آسرے ہن تھی ختم ویسن نہ کر توں رنج میݙا ہک توں ہیں

تیݙے باجھ سجݨ انہاں اکھیاں چوں نہ رکسی ہنج میݙا ہک توں ہیں

میں یار ہاں اصغر یار تیݙا نہ کر پنج پنج میݙا ہک توں ہیں

آ ݙیکھ تاں سہی ہک وار سجݨ جیویں میݙی نبھدی پئی ہے

سکھ منہ کر گئے ہن کئی ݙینہ توں ݙکھاں درداں جھوک چا لئی ہے

ہے جندڑی سولاں وات میݙی تھئی زندگی یار اجائی ہے

ہے اصغر ذہن تے یاد تیݙی جیڑی اج تک محض نہ گئی ہے

جݙاں شہر مدینے اپڑ ونجیں میݙا سجݨ سلام توں آکھیں چا

پئی سک دی سیک اچ نبھدی ہے تیݙا گھنداۓ نام توں آکھیں چا

کݙاں وارا آسی اصغر دا راہندی تانگ تمام توں آکھیں چا

تیݙے ورد وچ ݙینہ لنگھ ویندا ہے تھی ویندی شام توں آکھیں چا