استاد کالو خاں بزدار
آہ استاد کالو خان بزدار . بندے دی حیاتی اچ کجھ ایہو جیہاں شخصیات ایہو جہیں بھلے مانس ماہݨوں آندن جنہاں کن بندہ متاثر تھیندے اپݨے آپ کو انہائیں وانگوں ڈھالݨ دی کوشیش کریندے پر ایں وی تھیندے جو ویلھے دے نال نال بندہ جیویں جیویں ڄاݨوند تھیندا ویندے کجھ شخصیات تے کجھ نظریات کن اوندا دل پٹیچ ویندے وت او نویں شخصیات دو ٹر پوندے ٻنہاں دا تاں پتا نئیں پر میں جہیں بندے نال تاں ایویں تھئے اپݨے تئیں بہتر کن بہتر دی تلاش ہمیش جاری رہی اے. . پر استاد کالو نال کوئی ایہو جیہاں ڳانڈھا ڳنڈھیا جیرھا جو ہمیش دا ڳانڈھا ہئی جیئندا انت گذریل رات انہاں دے اچݨ چیت نکھیڑے تیں تھیا. میں جݙاں شعور سنبھالیا تاں استاد کالو اساݙے ٹریکٹر دا ڈرائیور(آپریٹر) ہئی. استاد دیاں ڳالھیں ݙاڈھیاں چسولیاں تے من بھانوݨیاں ہوندیاں ہن ایں پاروں آٹھئے اچ او جتھ ہل وہاوے یا وت کوئی بیا کم کرے میں تے میݙے سینگے چھوار ٻنے تیں ٻیٹھے رہوں ہا یا وت او تیل پواوݨ ونڄے تاں ساکوں نال چاتی ونجڄے ہا شئیت ایں پاروں استاد میکوں چنڳا لڳدا ہا. ستویں اٹھویں پڑھدا ہم تاں وساخ تیں کچاری اچ ٻہݨ دا شوق پئے ڳیا استاد کچاری دا سہرا ہوندا ہئی اوندیاں ڳالھیں ٻٹاں تے قصے ہمیش میکوں اپݨی گرفت اچ رکھی رہ ڳئے . اوں زمانے سرائیکی عوامی مشاعرے دھوم دھام نال تھیندے ہن .استاد تے کجھ ٻئے چھوار تے بزرگ موٹرسائیکلاں تیں مشاعریاں لئیوں اساں وݙے پندھ کیتے . چوٹی کن ہیرو پچادھی سانول سوبھ دا میلہ ہووے یا وت مھرے والا راجنپور عاشق خان بزدار دا میلہ، اساݙے موٹر سائیکل استاد کالو دی قیادت اچ تیار ہوندے ہن. مہرے والے دے میلے تیں جھمر تے نوبت استاد سئیں دے پسندیدہ ہن. ایویں کوݙی تے ملہݨ دا پڑ جتھ ہووے ہا اساں تیار ہوندے ہاسے. میݙے نال عجب رولا رہ ڳیا جو میں چھوہرکی نئیں کر ݙٹھی بس بچپن کن پٹکی بدھاں دی کچاری اچ بیٹھاں تاں اجاں تئیں اے سلسلہ جاری اے تے شئیت ہݨ چھوہرکی دی عمر وی ڳال ٻیٹھاں. پٹکی ٻدھاں دی محفل اختیار کرݨ دا کارݨ صرف اور صرف استاد سئیں دی چسولی شخصیت ھئ. تل وطنی دانش، لوک مثالاں، لوک متھاں نال میݙی سونہہ استاد دی وجہ توں ہئی پر جݙاں کالج ڳئیوم تاں انہاں چیزاں کوں مزید سیاسی رنگ اچ فضل رب لنڈ سمجایا فضل خان روشن خیال قومیتی سیاسی شعور رکھݨ آلے کارکن ہن تے انہاں دی سیاسی تربیت استاد فدا حسین گاݙی کیتی تے او استاد سئیں دے ٻانہہ ٻیل رہ ڳئے اڄ وی لوک سانجھ دے ایکٹیو کارکن ہن . او ڳالھیں جیرھیاں اساں استاد کالو کن بچپن اچ سݨیاں انہاں کوں سیاسی رنگ اچ رنگیندا لوک سانجھ اچ ݙٹھم، استاد کالو ان پڑھ بندہ تے لوک سانجھ اعلی تعلیم یافتہ پروفیسرز ، ڈاکٹرز، لکھاری تے دانشوراں دی سلھاڑ ایں پاروں جتھاں میݙا استاد کالو ولوں بیان کردہ تل وطنی دانش دیاں ڳالھیں تیں اعتماد آیا انہاں دیاں ڳالھیں دی اہمیت دی سدھ پئی اتھاں لوک سانجھ اچ کم کریندیاں وی چس آئی. استاد کالو ہمیش مرکݨی تے چسولی ڳالھ کریندے ہن وسیبی ڄٹ(رڑھ راہ) دے علاوہ میݙے کجھ سفید پوش سنگتی وی استاد نال ٻہہ ٻٹاں لئیندے ہن. پچادھ ٹربائن ونج لایئس تاں اتھاں جݙاں چھٹی تیں سلطان بزدار یارمضان قادر اسلام آبادوں آوۓ ہا تاں استاد نال ٻٹاں ضرور مارݨ ویندے ہاسے. رمضان قادر دے بارے استاد میکوں اہدا ہا اے تیݙا فقیر یار اے رزق بخت ہووݨ دے باوجود وݙائی کوئنسی. رمضان کوں ہمیش کھپیندا ہا" مزاورݨیں دا حال ݙے، سݨدوں جو وݙیاں جھڑکل تے چکھڑیاں تھیندئن". وت ایݙوں رمضان ہا اے کوڑ ٻتوڑ مار ڳالھیں ٹھہائی رہندا ہا. ہک ݙینہوار میکوں آکھئیس کچھی کینال دا منڈھ ݙکھال ڄلوں وئ ایندی پٹری نال ول تیکوں میں ݙساں جو اے کامیاب تھیسی یا ناکام. خیر اساں موٹر سائیکل اچ پٹرول سٹوا پل تیرہاں کن ابھے تیں وڳ پیو سے جئیں ویلھے دیرے دے اتوں پجئیوں تاں دول بین دی کئو ہئی میکوں آکھیس سدھ ہئی جئیں ویلھے میݙے کنیں بین دی کئو پووے میݙے پیر پٹیچݨ پئے ویندن ،بھاہ لا کچھی کوں آ ڄلوں جھمر ہوسی. . خیر دول بین دی کئو تیں پڄ ڳئیو سے تاں اتھ کتیاں دی دروک ہئی چس دا شغل ھئی سپیکر تیں اعلان تھیا جو اے کتی بہادر خان سیہڑ دی اے تے ایندی قیمت ترائے لکھ لڳ چکی اے . استاد میݙو ݙیکھ تیں کھلیا تے آکھیس ٹریکٹر نال برابری دا سودا لڳدے لاوں چا ؟. . .ایں ڳالھ دا حال سݨا کے وساخ تیں کافی مد کھلدے رہ ڳیئوسے.(کتیاں دی دروک اساں پہلی دفعہ ݙٹھی تے اے ساݙے لئیوں نویں ڳالھ ھئ) . اڄکل استاد ٹریکٹر تاں نہن چلیندے پر اساݙے جاہ تیں بلاناغہ شام دا چرک تئیں کچاری دی راند رسیندے ہن جیندے سانجھی کمال خان تے اللہ بشک بزدار، دلبہار ٹالبر، ممدی نانگری تے ٻئے وساخ دی کچاری دے مستقل ممبر ہوندے ہن، سلطان تے میݙی بچپن کن ہکا ڈیوٹی آندی پئی ہئی جو استاد کوں حقہ تازہ کر ݙیووں ہا یا وت ڳیٹا ڳول ݙیووں.. ݙو راتیں پہلے میکوں آکھیس فضل لنڈ کوں سݙ شیر مند بزدار(چئیرمین) نال ہک پڑ لواوں ہا.(اے پڑ ہمیش میݙی جاہ تیں رہ ویندے فضل خان سیاسی کارکن ان تے چاچا شیرمند لغاریاں دا ایکٹیو ورکر پڑ توں مراد سیاسی مباحثہ). میں روزی دے ترلے پاروں اپݨے علاقے کن باھر آں اج کوئی ݙاہ وڄے سلطان بزدار دا میسج آیا جو استاد کالو فوت تھی ڳئین دل نہ منیا کال کیتم تاں رووݨ ہاکڑا تھی کے آکھیس جو یار میں وی بہاولپور آں بینک دے کم تیں تے توں وی نویں پڄ سڳدا جنازے تیں بس میں کال کٹی ڳئیوم تے ٻیا کجھ سݨن دی سکت نہ رہی. اپݨی نال دی وستی دے نینگر عابد بزدار جیرھا جو آسٹریلیا علم دی ڳول اچ پردیس کٹیندا ودے میسنجر تیں پچھیس یار اہدن چاچا کالو جھوک لݙا گئے ، بر تھی ڳئیوں یارا .ہݨ کیندے نال کچاری کریسوں .کیا تھیا ٹھیک ٹھاک تاں ہن کوئی تفصیل؟ میں آکھیا یار میں وی ایویں سݨیے پر گھر کن باہر پنجاب ڳیا وداں تفصیل پچھݨ دی میݙے اچ نہ سکت ھے نہ کہیں کن پچھداں. . کجھ دیر پہلے سنگتی اللہ بشک بزدار دا فون آیا تے ݙسائوس جو یارا یار ٹر ڳئے اج بکھر(موضع) دے ونڑ رنن. . استاد دے نکھیڑے دا ݙکھ ناقابل برداشت اے پر کیا کریجے؟ استاد کالو مرحوم دی حق مغفرت کرے آمین
(بلال بزدار)