اداس نسلیں

اداس نسلیں اردو زبان وچ لکھا ونجݨ والا تاریخی ناول ہے جینکوں عبد اللہ حسین (پیدائش :14 اگست، 1931ء وفات:4 جولائی، 2015ء) نے 1963ء وچ تحریر کیتا۔ ایہ ناول عبداللہ حسین دی پہچاݨ بݨا۔ ایں ناول دے پنجاہ توں زیادہ ایڈیشن شائع تھی چکے ہن۔ ایں ناول کوں 1963ء وچ آدم جی ادبی انعام نال نوازا گیا۔

موضوع

اداس نسلیں دا موضوع برطانوی ہندوستان ہے۔ ایہ ناول اپݨے اندر ہک عہد دی تاریخ سموئے ہوئے ہے۔ ناول دے واقعات دی ابتدا 1857ء دی جنگ آزادی توں تھیندی ہے تے اختتام قیام پاکستان تے تھیندا ہے۔ ناول وچ 1857ء دی جنگ آزادی، جاگیردارانہ ذہنیت دا پھیلاؤ، کانگریس دی سیاست، آل انڈیا مسلم لیگ دی جدوجہد، جلیانوالہ باغ قتل عام، مسلم تشخص دا احساس، ݙوجھی جنگ عظیم تے اوں دے ہندوستان تے اثرات، ہندوستان وچ آزادی دی جدوجہد، تقسیم ہند دے فسادات تے قیام پاکستان دے واقعات کوں خاص کر اجاگر کیتا گیا ہے۔