آ میݙا جانیا آ میݙے دیس وچ
آ میݙا جانیا آ میݙے دیس وچ
आ मेडा जानी आ, आ मेडे देस विच
میݙے خیال اچ اساݙی ہک بی نسل وی ڳل ویسی ہوندے بعد وی اساݙے تِھنک ٹینک کݙاہیں ٻہہ تے اے فیصلہ نہ کریسن جو پِلاک PILAC ایوارڈ گھنݨ غلط ھ یا ٹھیک ھ. کتنی دیر دا کم ھ؟
مُڑی اساکوں آپت دی کھاپت توں فرصت ملے تاں اساں اے کم وی کروں. اتنے سال گزر ڳن اج وی پلاک تے ݙوں رائے موجود ہن.
پلاک حکومت پنجاب دا ادارہ ھ جئیں جہانگیر مخلص سئیں کوں ہُنیں دی علمی ادبی خدمات دے اعتراف اچ ایوارڈ ݙتا تے نال ترے لکھ روپیہ انعام وی ڈِتا. ایوارڈ ملدیں ای پُرانڑاں قضیہ ول سِر چا آیا اتے کافی سیانڑیں بندیں وی اینجھی تحریراں لکھیاں جو اج تک سرائیکی دانش حیران ھ. خیر جوان بہوں وݙا ہووے تاں نہ ایوارڈ وݙا ہوندے تے نہ انعام. آکھیس تساں آپنڑیں آپنڑیں شعور دے مطابق جݙاں فیصلہ ونڄ کرو میݙا شعور ہِیں ایوارڈ توں زیادہ بُلند ھ. لہٰذا ایوارڈ واپس..................
جہانگیر مخلص سئیں اساݙی دھرتی دے مہان شاعر ہِن. ہُنیں دی شاعری وچ روہی دی کُوک اینجھے بھرپور انداز اچ سُنڑیندی اے کہ سماعتاں اکھیں بنڑ تے خواجہ فرید سئیں دے پیریں دے نشانیں نال پاک تھئے ہوئے ٹوبھیں دی جھلک ڈِکھاوݨ پئے ویندِن. مخلص سئیں الیندِن تاں کہیں کہیں ویلھے لوظ رُکݨ پئے ویندِن. میکوں لگدے جو اے لُکنت نہیں بلکہ شاید لوظ آپنڑیں حیثیت بارے سوچݨ لگ ویندِن. او سوچیندِن جو کیا اساں ہِیں قابل ہاؤں جو اساں او سچائی بیان کر سڳوں جیہڑی مخلص سئیں دے لاشعور کوں پَوِتر رکھیندی ھ. کیا اساݙی اوقات ھ جو اساں ہُنیں جذبیں دے اخلاص کوں بیان کر سڳوں جیہڑے جہانگیر سئیں دے سُچل دِل اچ موجزن ہن؟ اِتھائیں ول مخلص سئیں دا شعور لوظیں دی ٻانہہ پکڑیندے اور ہُنیں کوں ایویں سِنگھار تے روانہ کریندے کہ سارا ماحول حسِین تھی ویندے. اے اینجھا سوہنڑاں تے وکھرا انداز ھ جو کہیں کہیں ویلھے میں ہُنیں کوں نظم پڑھدا ݙیکھ کراہیں سوچینداں جو لوک وَاحْلُلْ عُقْدَةً مِنْ لِسَانِي کیوں پڑھدِن.....؟ اللہ سوہنڑیں دیاں رمزاں کون جانڑدے..
مخلص سئیں دی شاعری دی پوِترتا کوں میں ویدیں دے اشلوکیں نال ونڄ رَلاواں تاں اَسلوں مُبالغہ نہ کریساں میں تاں ہُنیں توں وی اڳوں ڳھن وَنجݨ چاہنداں جو اشلوکیں وچ تاں دیوتائیں دیاں ڳالھیں ہوندِن جبکہ میݙے ویاس دیو دے لکھے مصرعیں وچ میݙیاں ڳالھیں ہِن... اُوویں دِیاں اوویں ہِن جیویں میں یا میں جیہاں کوئی ٻیا سوچیندے..
جیویں مخلص دا اخلاص جہانگیر ھ اوویں ہُنیں دی شاعری عالمگیر ھ. سوجھل دھرتی واس کوں اعزاز حاصل تھئے جو ہُوں مخلص سئیں دے حضور سوجھل ایوارڈ پیش کیتے. صوفی تاج سئیں آہدِن "جݙاں کہیں وستی وچ شاعر پیدا تھیندے تاں او ہوں وستی دی تاریخ دا ٻہوں وݙا واقعہ ہوندے" میں سمجھداں کہ جݙاں شاعر دھرتی ماء نال عشق کریندے اور ہوندے درد ڳمدے تاں او ساری دھرتی دا معتبر حوالہ بݨ ویندے. اساکوں آپنڑیں ماء دھرتی دے لعل تے فخر اے.
"اساں تاں خواب ہیں کُوڑا اساں وِسواس ہیں سانول اساں مُندرے ہوۓ ہونٹاں دی ہک ارداس ہیں سانول
اساں چُپ چاپ کُس گئے ہیں اَلیندی پئی ھ رَت ساݙی اساں تاں کھوڑ تے وِکدے تِھڑکدے ماس ھیں سانول"
(उसमान क्रीम भुट्टा, عثمان کریم بھٹہ)