آ میݙا جانیاں آ میݙے دیس وچ
آ میڈا جانیاں آ میڈے دیس وچ
آمیڈا جانیاں آمیڈے دیس وچ آ کے ڈیکھیں جو دردیں دی سولی اتے لوک چڑھدن کیویں لوک لہندن کیویں.
پتھریں دے بنڑے ہوۓ گھریں دے اندر ریشمی جسم ڈکھاں کوں سہندن کیویں.
مونجھاں کونجیں دے وانگوں چودھاروں پھرن شام تھیوے تاں کندھیاں تے بہندن کیویں.
رات بے سئیت لوکاں دے گھر دے اندر ویݨ در دے ولیکھاں توں آندن کیوں.
آکے ڈیکھیں جو دردیں دی درسال تے ایں حیاتی کوں کیویں رو وایا ویندے.
اپنڑیں آکھیں دیں ہنجھوں کوں پالنڑ کیتے بے کسی کوں وسیلہ بنڑایا ویندے.
اتھ تاں معصوم دے ہونٹ سیتے ویندین اوندئیں جذبیں کوں سولی چڑھایا ویندے
عید دی رات ہے بھانویں شب رات ہے دڑکے ڈے ڈے کے اوکوں سمایا ویندے.
آمیڈا جانیاں...
آکے ڈیکھیں جو روہی دا راول اتھاں کیویں جیونڑ دی خیرات پندا کھڑے.
گھگھ اندھارے اندر، گنگےلوکیں کیتے، سنجے سجھ دے کولھوں جھات پندا کھڑے.
اتھاں بکھے ببھر گھن کے کوئی نہ سمے اپنڑے مالک توں او رات پندا کھڑے.
تتی روہی تے روح نال رج کے وسے ایجھیں ساونڑ دی برسات پندا کھڑے.
آمیڈا جانیاں....
آکے ڈیکھیں جو جمدے ہوئے بال کوں سول صدمے ملن ساہ کوں سانگاں ملن.
گھٹی ڈکھاں دی اوکوں پلائی ونجے اوندے کنیں دے وچ بکھ دیاں بانگاں ملن.
دھیریں جمن تاں ما پیو کوں جھورا لگے سیندھ سرمے ملن نہ کوئی مانگھاں ملن
چاندی کھنڈدی ونجے توڑے سر دے اتے سیجھ رنگلی کیتے صرف تانگھاں ملن.
آ میڈا جانیاں آ میڈے دیس وچ...
آ کے ڈیکھیں جو بے علم ملا کنوں دین بدلے زمانے دیں ریتاں دے وچ.
اوندے متھے محراب بکھدا کھڑے اوندی گذری حیاتی پلۂپاں دے وچ.
ساکوں فرقے بنڑا کے لڑایا ویندے اساڈا مذۂب وی آگۓ فصیتاں دے وچ.
چھینڈے اڈدن لہو دے دیواریں توڑیں کیویں انسان کسدے مسیتاں دے وچ.
آمیڈا جانیاں آ میڈے ڈیس وچ.
آکے ڈیکھیں جو حاکم دے ہرکارے اتھ اوندا لکھیا ہے پڑھ پڑھ سنڑیندے ودن .
جنھاں اکھیں کوں خاباں دی عادت ہائی انہاں اکھیں کوں اندھا کریندے ودن.
جنھاں ہونٹیں تے لفظیں ٹھکانڑا کیتے انہاں ہونٹاں توں ہر لفظ چئیندے ودن.
جنھاں ہتھاں کو سچ کوڑ لکھنڑ دی عادت ہائی انھاں ہتھاں کوں بانہاں تئیں کپیندے ودن.
آمیڈا جانیاں آ میڈے ڈیس وچ.
آتے ڈیکھیں جو پڑ تے پئی بار ہے لوک آندے کھڑن آپنڑیں لانڑھیں کیتے.
بار ڈے کے بھتاریں دا لیکھا کیتے کوئی گھلیندا رہا میکوں تھانڑئیں کیتے.
میڈے گندھڑے کلہوٹیاں وی واندیاں رہیاں بال روندے کھڑن شۓ دیں دانڑیں کیتے.
سال پورے دا پوہریا انویں رل گیا بھوں وی بچ نہ سگیا میݙئیں بھانڑے کیتے.
آمیڈا جانیاں آ میڈے ڈیس وچ.
آ کے ڈیکھیں جو میڈے مقدر دے وچ اوکھے پینڈے ریہے پندھ کشالے ریہے.
تیڈے سانگے ڈسا خوشیاں کتھوں پناں میکوں ملنڑ کیتے ڈکھ اوبہالے ریہے.
میڈے کیتے تاں بدرا دی دھپ وانگے ہن اے ہونالے ریہے یا سیالے ریہے.
تیڈے ہتھاں تے مہندی اونویں نہ لگی میڈے پیراں تے آڈیکھ چھالے ریہے.
آمیڈا جانیاں آ میڈے ڈیس وچ.
پرفیسر جہانگیر مخلص