آزاد خیر پوری
اصل ناں محمد اسلام الدین
قلمی ناں آزاد ؔخیر پوری
جٖمنْ 1955ء
جاہ پتہ خیر پور ٹامیوالی ۔بہاولپور
غزل
[لکھو | ماخذ وچ تبدیلی کرو]بٖہوں مصروف ہئی دنیا سہارا کون ڈٖیوے ہا
اندھارے کوٹھڑے کیتے ستارا کون ڈٖیوے ہا
اے تاں میں حوصلہ کر کے بچائی پلکاں دے وچ رکھیم
نتاں بے جرم ہنجواں دا کفارا کون ڈٖیوے ہا
میڈٖا سنگتی ، میڈٖا ہانْی ، میکوں پینگھاں جھٹائی رکھدے
نہ ہوندی سچ محبت تاں ہلارا کون ڈٖیوے ہا
قسم رب دی میڈٖے رب دی وڈٖی اے مہر بانی ہے
جیکر مُک ویندا گھر اَٹّا ادھارا کون ڈٖیوے ہا
جتھاں آزادؔ گلشن کوں ڈھہاونْ کھڑ ونجٖٖے مالی
اتھاں اکھیں کوں من بھاندا نظارا کون ڈٖیوے ہا
؎میڈٖی کیا اوقات ہے یارو لٹ گھندن فنکاراں کوں
چلدے چلدے ٹھگٖ ویندے ہن عشوہ گر بازاراں کوں
لازم نئیں آزادؔ اتھاں ہر شخص گزارے چپ کر کے
ظلم کوں کھل کے سہہ گھننْاں نئیں راس آندا خود داراں کوں
٭٭٭