ݙیٹی ݙنا

دیہات وچ کھیڈیا ون٘ڄݨ آلا ہک مشور کھیڈ ہے۔ جیہڑا ڈو بندیں تو زیادہ کھیڈ سگدن۔ ایندے کھیݙن دے ݙو طریقے ہن 1۔ کائوڈی آلی 2۔ ترائے ٹلے آلی

قسماں

کاؤݙی آلی

کاؤݙی آلی ݙیٹی ݙنے وچ ݙوں پالٹیاں (ٹیماں)ہوندین. ٹاس یا پکھے توں بعد ہک ٹیم واری کھیݙدی ھ تے ہک واری ݙیندی ھ. جیہڑی ٹیم ٹاس جتیندی ھ او او واری کھیݙدی ھ تے ہرݨ آلی پالٹی واری ݙیندی ھ. سبھ توں ودھ اہم ڳالھ اے ھ جو واری شروع تھیونوݨ توں پہلے کائوݙی طے کیتی ویندے ھ. اکثر تاں پنج توں گھن ہزار تک کاؤݙی رکھی ویندی ھ. جݙاں ایندے وچ کھݙکاریں دی ڳݨتری وہ ٻہوں اہم ہوندی ھ. کاؤݙی دے نمبر طے تھیونڑ توں بعد ٹُلے طے تھیندن جو ہر کھݙکار کتنے ٹُلے مریسی. اتے ایں کھیݙ وچ وی وی پِل (پِلی)کھٹی ویندے ھ اتے واری ݙیونڑ آلی پالٹی پِلی دے سامݨے کھڑویندن. ول کھیݙ باقاعدہ شروع تھیندے. واری ݙیوݨ آلے ہک ٻئے دے پچھوں ݙو ترائے فٹ دے فاصلے تے کھڑ ویندن. ٹاس جیتݨ آلی ٹیم دا ہک کھݙکار پِلی توں ݙنے دے زور تے ݙیٹی کوں پوری طاقت نال اٹکیندے. بھانویں ریڑھویں اٹکاوے بھانویں اݙردی اوندی مرضی ہوندی اے. اݙردی جھپیج ڳئی تاں واری مک ویندی ھ ناں تاں پلی تے رکھیے ݙنے کوں ٹک مریسن. ݙنے کوں ٹک لڳ ڳیا تاں واری مک ویسی ناں تاں کھݙکار ݙیٹی کوں ٹھہا تے ٹلا یا ٹک مریسی. ٹک کیا ہوندے. ٹک اے ھ جو ݙیٹی کوں زمیں تے ٹھاہایا ویندے ول اونکوں ݙنا مر تے اٹکایا ویندے تے اوں اٹکی ہوئی ݙیٹی کوں ہوا وچ ٹک مریندے ٹک لڳ گیا تاں ٹھیک نہ تاں واری مک پوسی. ایویں جے تک ٹک مریندا ویسی کھیݙدا رہ ویسی. جتھاں ٹک مک گیا. اتھوں ݙاھاکے دی شکل وچ نمبر منگسی جیویں جو ݙاہ، ویھی، تریھی، چالھی، پنجھا، سٹھ، ستر، سو، ہک سو تریھی، ہک سو اسی، ݙو سو نوے وغیرہ. ھݨ واری ݙیوݨ آلیاں دی مرضی ہوسی جو او نمبر پل تک کچھن یا ناں کچھِن. جے انہاں نمبر کچھیے جیہڑے جو ݙنے نال پلی تک کچھیندے ھن. او نمبر پورے تھی گے ٹھیک او کھݙکار ول ݙیٹی پلی توں اٹکیسی،. تے ول اونویں کھیݙسی، نمبر پورے ناں تھئے تاں واری مک پوسی. یاد راہوے نمبر کچھدیں جاہ بچ ونجے کھٹی تاں واری دی وی چھٹی. ایویں سارے کھݙکار واری واری کھیݙدن. جݙاں تک کئی ہک ٹیم کاؤݙی دے طے تھے ہوئے نمبراں تک نہ پڄ ونجے. ایں طریقے نال ݙوہیں پالٹیاں کھیݙسن. ہک ٻئے دی واری جلدی مکانوݨ دی کوشت وی جاری راہسی، ول ول کھیݙݨ دا موقع وی مل سڳدے تے کئی واری ہکا واری وچ وی کاؤݙی بھرݨی آویندی ھ. جݙاں ہک پالٹی تے کاؤݙی آویندی ھ تاں جیتݨ آلی پالٹی دا ہر کھݙکار واری واری ݙیٹی ہتھ وچ پا تے ہوا وچ اݙار تے ݙنے نال زور دار ٹلا مریندے تاں جو ݙیٹی ڈھیر پرے ونجے. اے ٹلے ترائے توں ݙاہ یا پندھراں وی تھی سڳدن. اے ٹیماں دی مرضی ہوندی ھ پر اے کھیݙ شروع تھیونڑ توں پہلے طے تھیندن. جݙاں ھیتݨ آلے سارے کھݙکار اپڑیں اپڑیں مقررہ ٹلے مار گھندن. تاں ہرݨ آلے کھݙکاراں وچوں ہر کھݙکار ہک ہک ساہ کاؤݙی بھریندے. ہرݨ آلا کھݙکار جتھاں ݙیٹی ہوندی ھ اتھاؤں کاؤݙی کاؤݙی آہدیں ہوئیں پلی آلے پاسے بھڄدے یعنی دھروکݨی لیندے. اوندے نال جیتݨ آلا ہک کھݙکار وی ناک بھڄدے، تاں جو ݙیکھ سڳے جو کاؤݙی بھرݨ آلے دا ساہ کتھ مکئے. ایویں واری واری سارے ہک ہک ساہ کاؤݙی بھریندن. جے اے پلی تک پڄ ونجن تاں ٹھیک ناں تاں ول ہک کھݙکار طے شدہ ٹلے مریسی تے ہرݨ آلے کھݙکار ول ہکو ساہ وچ پلی تک پڄسن. جے ول ہکو ساہ وچ نہ پڄ سڳیا تاں ول ݙو کھݙکار ٹلے مریسن تے ہرݨ آلیاں وچوں. ݙو کھݙکار کاؤݙی بھریسن مطلب ݙو ساہواں دی اجازت ہوسی. ایویں اے کم چلسی پیا جݙاں تک ہرݨ آلی پالٹی پلی تک نہ پڄسی. جݙاں ہرݨ آلی پالٹی پلی تے پڄ ویسی ول ہرݨ آلی پالٹی پہلے واری کھیݙسی. تے ول اے سلسلہ انویں چلسی پیا.

ترائےٹلّے آلی

ݙیٹی ݙنے دی ایں ونکی وچ وی جوڑیاں یا ٹیماں بݨائیاں ویندن ول ٹاس توں بعد یا پکھے پانوݨ توں بعد پکھا جیتݨ آلی پالٹی کھیݙدی ھ. ایندے کیتے سب توں پہلے بھوئیں تے ہک جاہ اتے پِلی کھٹی ویندی ھ اے ہک مخصوص طرحاں دی کھݙ ہوندی ھ جیہڑی جو الف وانگ نظر امدی ھ. ٹاس جیتݨ آلی ٹیم دا ہک کھݙکار اوں پلی توں ݙنڈے نال ݙیٹی کوں اُٹک ݙیندے تاں جو ݙیٹی پرے ونجے. ݙوجھی ٹیم آلے ݙیٹی کوں جھپݨ دی کوشت کریندن. ݙیٹی زمین تے ڈھانہݨ توں پہلے جھپیج ونجے تاں اوں کھݙکار دی واری مک پندی ھ. جے بچ ونجے تاں ول. کھݙکار ݙنے کوں پلی تے سدھا رکھیندے. یاد راہووے ݙنا پلی تے کراس رکھیا ویندے. ایویں جو جمع. دا نشان بݨ ونجے. جݙاں ݙنا رکھیج ویندے تاں واری ݙیوݨ آلی ٹیم دا ہک کھݙکار ݙنے کوں ٹک مارݨ دی کوشد کریندے. ٹک لڳ ڳیا تاں ٹھیک ناں تاں کھݙکار ݙیٹی کوں بھوئیں تے ٹھاھا. تے ترائے ٹُلے مریندے بھانویں انہاں وچوں کئی چُک وی ونجے تاں کئی مسئلہ نی ہوندا ترائے ٹلیاں توں بعد ݙوجھی ٹیم آلے ول پلی تے ٹھیہے ہوئے ݙنے کوں ٹک مریندن. ٹک لڳ ونجے تاں کھݙکار دی واری مک پمدی ھ اتے ول ٻیا کھݙکار کھیݙدے، ناں تاں ول ترائے ٹلے مریندے، اے سلسلہ ایویں چلدے پیا تے جݙاں ساری ٹم کھیݙ گھندی ھ تاں ݙوجھی ٹیم وی ایویں کھیݙدی ھ.

ٻیا ݙیکھو

• سرائیکی کھیݙاں