ݙو مہان سوجھوان
دھرتی دا سلام دھرتی دے ڈو مہان سوجھوانڑاں نانویں. ..
. تخت پنجاب ہمیش کن اپنڑی حمائت تے پروپیگنڈے واسطے شاعراں،لکھاریاں،صحافیاں تے مولویاں کوں استعمال کریندا رہیئے ادب دے قاسمی کن گھن ٹی .وی دے نکے وڈے اینکر اینکری تئیں ہک فوج شتربےمہار دی حمائت اوکوں حاصل اے تل وطنی زباناں دے وجود تے تل وطنی قوماں دی شناخت دے انکار وچ جتھاں اوند وسعتی نظریۓ دا عمل دخل اے اتھاں او ایں اٹکل نال تل وطنی قوماں دے وسائل ہڑپ کرنڑ اچ ڈاڈھی مہارت رکھدے .موجودہ پنجاب اچ سرائیکی تے پوٹھوہاری زبان ،کلچر تے قومیت کوں تخت پنجاب ولوں تسلیم کرنڑ توں انکار دراصل شناخت کن زیادہ معاشی مسئلہ اے.
تخت پنجاب تے اوندے کرتے دھرتے سرائیکی زبان کوں پنجابی دا لہجہ آکھ کے سرائیکی وسیب دے وسائل تے اپنڑاں قبضہ ھمیش واسطے جماون چاہندن. جے پنجابیاں کوں اپنڑی زبان نال پیار ھوندا تاں او اپنڑے سکولاں اچ اپنڑے بالاں کوں پنجابی پڑھیندے پر او ایں خوف کن اپنڑے بالاں کوں وی انہاں دے بنیادی حق مابولی اچ تعلیم کن محروم رکھدن جو ول تاں سرائیکی وی ایہو مطالب کر ڈیسن تے پنجاب دا وسعتی نظریہ ویندا تھیسی.
وسائل دی ونڈ تھیسی تے انت تخت دا وی تختہ تھیسی پنجابیاں دی نہ سیاست رہسی نہ لٹ پٹ دی معشیت.
سرائیکی کوں پنجابی دا لہجہ منواونڑ لئیوں او سرائیکی دے صوفیا شعرا دے کلام کوں پنجابائز کر کے چھپوا چکن خواجہ فرید سرکار تے بلھے شاہ دے کلام کوں وگاڑن ایں سلسلے دی کڑی اے.اے سلسلہ اجاں جاری اے غلام حسن حیدرانی تے اقبال سوکڑی دیں لکھتاں نال وی او ایہں کجھ کر حکن. کہیں شاعر دے کلام کوں چھپواون تے ایوارڈ ڈیونڑ انہاں واسطے کوئی مشکل کائنی کیوں جو سرکاری وسائل انہاں دے ہتھ ان. سرائیکی لکھاریاں کوں پنجابی گھیرے اچ گھن آنونڑ واسطے ایں واری انہاں سرائیکی دے مہان شاعر رفعت عباس سئیں کوں پرائیڈ آف پنجاب ایوارڈ ڈیونڑ دا اعلان کیتا تے نال چنگی رقم وی رکھی. ورلڈ پنجابی کانگریس آلے نینگر سوجھوان محبوب تابش سئیں کوں سڈیندے بیٹھن جو آو تہاڈا ایوارڈ اے تے اپنڑی مرتب کیتی ہوئی نعتاں دی کتاب ساڈے حوالے کرو تاں جو چھپوا وی ڈیووں.
بدقسمی نال پنجابی تخت دے کرتا دھرتا سرکاری دانشوراں دا سرائیکی وسیب ، لٹریچر تے شخصیات بارے مطالعہ بہوں کمزور اے . .
شئیت انہاں کوں سدھ کائینا ہئی جو اے رفعت عباس اے. اے تاں "ما بولی دا باغ" رہیندے ول باغ کوں بوہے لئیندے. انہاں بوہیاں وچوں او صرف صوفی لنگھنڑ ڈیندے، جنج لنگھنڑ ڈیندے تے شاعر لنگھیندے. پر حاکماں واسطے، دھاڑیلاں دے گھوڑے واسطے او اپنڑے بوہے کو سوئی دا نکا بنڑا ڈیندے . ول اے مہان بندہ کیویں تہاڈے تخت دے ایوارڈ گھنسی کاش پنجابیاں کوں عقل آندی. محبوب تابش سئیں رفعت عباس بارے کیا خوب آکھئے. .! سونے،رپے،تمغے تیڈے تابش تیکوں بخشے تھیون ساڈا مانڑ ھ ما بولی تے ما دھرتی دے لوک ساڈے
. کاش انہاں پنجابیاں کوں سمجھ آندی جو "سرائیکی قومی تناظر" کتاب دے لکھاری محبوب تابش جنہاں اپنڑیں ایں کتاب اچ سرائیکی دھرتی دے وسائل دی لٹ دا مقدمہ لکھئے کیا او ورلڈ پنجابی کانگریس یا تخت پنجاب دے کہیں بئے لوبھ کوں قبول کریسی تے تہاڈے سڈ تے حاضر تھیسے؟ رفعت عباس سئیں بجافرماۓ جو. . . نواں ہک نروار کریجے مر تے جی دا رفعت
اساں نئیں منیندے آکھو ہوکا ہک سرکاروں
. مکدی گالھ شمیم مکاوں جو مرشد رفعت عباس تے محبوب تابش سئیں نے جیویں پنجابی حکومت تے پنجابی تنظیمیں دے اعزازات تے مالی فوائد واپس کیتن یا گھننڑ توں انکاری تھئین ایندے نال سرائیکی قومی شناخت اگونہی تھئی اے اور وسیب دے لوکاں اپنڑے سوجھواناں تے فخر کیتے. .
انہاں ڈو مہان سوجھواناں کوں اساں تہہ دلوں دھرتی دا سلام پیش کریندوں.
(بلال بزدار)