ݙو حکایتاں

ڈو حکایتاں

درخت دی منشا

ہک ڈینہ اساں درخت توں اوندی منشا پُچھی ' درخت اگوں کھل پیا ' تساں میڈی منشا میڈے دوستیں توں پُچھو ' چیڑی توں گالھڑ توں

چیڑی آکھیا درخت دا خواب اے اوہ دریا اینجھا بنڑ ونجے لوکیں کوں جیڑھا مونڈھے تے پار پُچاوے ' بیڑی دی کوئی لوڑ نہ ہووے "

گالھڑ مُرکیا " درخت دی سِک اے اوہ قصہ اینجھا بنڑ ونجے جیندیاں چڑھ پوڑیاں تے لوک باہون تے کرسی دی کوئی لوڑ نہ ہووے "

درخت آکھیا " بیڑی یا کرسی بنڑن وچ کوئی حرج نئیں جے دوست باہون "

.............................................................

اَدھور

اوں خواب وچ ہک مچھی ڈِٹھی " میں ہک بئے جنڑے دے خواب دی مچھی ہاں ' تو جیندے خواب وچ آ گیا ہیئں تے خاب اوندا اپنڑے ایں خاب وچ ڈیدھا پیئیں " میں تساں ڈوہیں دے خاب وچ پئی آندی ہاں " مچھی بولی

اوں ڈٹھا ایہ ساوی تے رتی ہک جھال دی مچھی ہے تے خاب دے بوہے دے اندروں پئی تردی ہے ' ایہ مچھی تاکڑی دے پردیاں پَچھوں پَیہ ویندی وت نکل آندی ' اوہ کھلیا جو مچھی انہاں پردیاں کوں ندی پئی سمجھدی ہے ' مچھی وی کِھلی جو ندی کوں اوہ تاکڑی دے پردے پیا سمجھدا ہے ' اوں ڈٹھا جیندے خاب وچوں اپنڑا اوہ خاب پیا ڈیدھا ہے اوں مچھی کوں ہکل ہک ڈتی اے ' مچھی ندی وچ گُم تھی گئی ' کنارے تے اوہ بیڑی وچ تھی بیٹھا ' اُتھاہیں ہک جل پری آ گئی

ہُنڑ ایں خاب وچ مچھی , جل پری , اوہ آپ تے جیڑھا اوندا خاب پیا ڈیدھا ہے چار جی موجود ہِن پر چارے ہکے ویلے وچ کٹھے نئیں پئے تھیندے

(رفعت عباس)

26 January at 17:53